Lideri suprem i Koresë së Veriut, Kim Jong Un, ka marrë një letër personale nga presidenti i Shteteve të Bashkuara të Amerikës, Donald Trump. Lajmi është bërë i ditur nga media shtetërore koreano-veriore, që ka publikuar një fotografi të udhëheqësit Kim duke mbajtur letrën me siglën e Shtëpisë së Bardhë.
Në raportim nënvizohej se Kim vlerësoi “përmbajtjen e shkëlqyer të letrës”, duke shtuar se nisur nga aftësitë gjykuese politike dhe kuraja e jashtëzakonshme e Trump, Kim Jong Un do ta shqyrtonte me seriozitet përmbajtjen interesante të letrës. Sekretari amerikan i Shtetit, Mike Pompeo, konfirmoi ditën e djeshme se letra ishte dërguar dhe u shpreh se “shpresonte që kjo do të përbëjë një bazë të mirë për të filluar dhe vazhuduar diskutimet e rëndësishme me koreanët për çnuklearizimin e gadishullit”.
Më herët këtë muaj, Trump pranoi të kishte marrë një letër “të bukur”, “shumë personale” dhe “shumë të ngrohtë” nga udhëheqësi koreano-verior. Ndonëse, bisedimet për çështjet bërthamore mes zyrtarëve amerikanë dhe atyre koreano-veriorë janë në një “pikë të vdekur”, udhëheqësit e dy vendeve kanë shkëmbyer letra dhe fotografi gjatë këtij viti dhe pohojnë se marrëdhëniet mes tyre vazhdojnë të jenë të ngrohta.