Agjencia iraniane për energji bërthmamore ka njoftuar se vendi i ka tekjkaluar nivelet e pasurimit të uraniumit, të përcaktura nga marrëveshja ndërkombëtare bërthamore e vitit 2015. Lajmi është bërë i ditur nga media shtetërore që citonte zëdhënësin Behrouz Kamalvandi, i cili ka deklaruar se nivelet e pasurimit kishin arritur në afro 5 për qind, duke e shkelur kufirin prej 3.67% vendosur në Planin e Përbashkët Gjithëpërfshirës të Veprimit.
Presidenti i Iranit, Hassan Rouhani, tha se vendi i tij do të fillojë pasurimin e uraniumit në nivele më të larta, nëse nuk lehtësohen sanksionet nga nënshkruesit e tjerë të marrëveshjes së vitit 2015. Ndërsa, nga ana tjetër, Presidenti i SHBA-ve, Donald Trump, paralajmëroi të dielën Iranin që “të ketë kujdes”.
Trump nuk foli konkretisht për masat që po planifikon administrata e tij, por përsëriti qëndrimin se “Irani nuk do të ketë kurrë një armë bërthamore”. Marrëveshja e ndalon Iranin të prodhojë uranium të pasuruar mbi nivelin 3.67% dhe e lejon të mbajë vetëm 300 kilogramë nga ky lloj materiali në rezervat e vendit.