Kryeministri i Kosovës dha dorëheqjen pasi një gjykatë për krimet e luftës në Hagë e thirri atë për t’u marrë në pyetje si i dyshuar. Ramush Haradinaj, 51 vjeç, shërbeu si komandant rebel në konfliktin e Kosovës 1998-1999, që përfundimisht çoi në shpalljen e pavarësisë së Kosovës. Ai tha se dha dorëheqjen në mënyrë që të mund të ndiqte çështjen në gjykatë si një qytetar i zakonshëm. Haradinaj, i cili mohon akuzat për krime lufte, është gjykuar dhe është liruar dy herë në gjykatën e OKB.
“Kam marrë një thirrje nga gjykata speciale si një i dyshuar dhe mu ofrua të shkoja si kryeministër ose si qytetar i zakonshëm i Kosovës”, – u tha ai gazetarëve të premten duke shtuar: “Unë zgjodha këtë të fundit.”
“Përgjegjësia tani shkon te presidenti për të filluar konsultimet për të caktuar datën e zgjedhjeve [të përgjithshme],” – shtoi ai. Haradinaj tha se do të merret në pyetje javën e ardhshme.
Gjykata e posaçme e mbështetur nga BE u krijua në vitin 2015 për të gjykuar krimet e luftës të pretenduara si të kryera nga Ushtria Çlirimtare e Kosovës (UÇK) kundër pakicave etnike dhe kundërshtarëve politikë.
Haradinaj shërbeu si komandant i UÇK-së gjatë luftës me Serbinë. Serbia ka pretenduar se ai mbikëqyri një fushatë torture dhe vrasjeje kundër serbëve etnikë gjatë konfliktit. Ai është liruar dy herë nga akuzat për krime lufte në Hagë – së pari në vitin 2008 dhe më pas në vitin 2012, por Serbia tha se kishte prova të tjera që përfshijnë vrasje civile.
Haradinaj ka mohuar vazhdimisht akuzat, dhe dha dorëheqjen si kryeministër pas vetëm 100 ditësh në 2005 për t’u përballur me akuzat. Gjyqtari në gjyqin e tij më të fundit në vitin 2012 tha se nuk kishte prova për të mbështetur pretendimet.
Kosova shpalli pavarësinë nga Serbia në vitin 2008, edhe pse Serbia nuk e ka njohur kurrë këtë. Haradinaj u mbajt për më shumë se një javë në Francë në vitin 2017 mbi një urdhër arresti serb para se të lirohej. ©marrë nga BBC, përshtati LAPSI.al
Para disa ditësh, u ndalua vëllai i z.Ramush Haradinaj në Vjenë, në bazë të një urdhëri arresti të një gjykate serbe.
Dihet se familja Haradinaj ka disa pjestarë të saj të vrarë nga serbët.
Dihet gjithashtu se edhe një pjesë e madhe e të ashtuquajturve “serbë etnikë” në Kosovë, u bënë pjesë e njësive paraushtarake që bënë masakra të mëdha tek shqiptarët, me mbështetjen e ushtrisë serbe.
Nuk ka sepse të konsiderohen këta serbe banorë në Kosovë , si njerëz civilë që janë ndëshkuar pa të drejtë e ndaj tyre qenkan bërë krime lufte, kur ata i kanë bërë vetë më parë këto krime ndaj shumicës shqiptare..
Unë nuk dij që shqiptarët e Kosovës që përbëjnë 90% të banorëve të këtij shteti, të kenë shkuar për të pushtuar territoret e shtetit serb, por ka ndodhur e kundërta. Ishte makina ushtarake e Serbisë së Millosheviçit ajo që erdhi në Kosovë e bëri masakra në popullsinë e pafajshme shqiptare.
Së fundi do të shtroja pyetjen :
Ka pasur Kosova arsyen që të krijojë gjykata speciale për të ndëshkuar kriminelë pushtues serbë që kanë bërë masakra në popull. A është arrestuar ndonjë kriminel lufte serb në ndonjë vend të Europës, në bazë të ndonjë vendimi arresti të ndonjë gjykate shqiptare të Kosovës ?