Me valën rekord e të nxehtit në Shtetet e Bashkuara të Amerikës, të intensifikuar sidomos në rajonet e Midwestit dhe përgjatë bregut lindor, zgjidhja që kanë gjetur autoritetet vendore të zonave me të prekura janë qendrat e ftohjes.
“Në njërën prej tyre në Brooklyn, sistemi ftohës me ventilatorë të fuqishëm i kthente këto ambiente të freskëta ne një oaz kënaqësie në mesin e temperaturave 36.7 gradë Celsius, të cilat lagështia në ajër i bënte të ndiheshin si 43,3 gradë.”- raporton “Reuters”.
Mjaft të moshuar e kanë si shpëtim këtë zgjidhje, disa prej tyre siç është rasti i 63-vjeçarit Pascual Valle, që foli për agjencinë prestigjioze të lajmeve “Reuters”, hyjnë atje në 9:00, të mëngjesit e nuk dalin deri pasdite, kur qendra mbyllet në orën 5:00.
Zyrtarët e shërbimeve të emergjencës për qytetin kanë dërguar shishe me ujë dhe Gatorade, të cilat iu dorëzohen të gjithë atyre që ndalojnë në këtë qendër për t’u freskuar. Vala e të nxehtit që ka munduar gati një të tretën e popullatës së SHBA-së këto ditët e fundit, pritet të thyhet gjatë ditës së sotme me një shpërthim stuhish e reshjesh freskuese shiu, pasojë e një fronti të ftohtë.
“Situata e krijuar i kishte detyruar zyrtarët që praktikisht t’i luteshin njerëzve, të qëndronin brenda sa më shumë të mundeshin e të bënin kujdes për shenjat e problemeve shëndetësore nga i nxehti. Mësohet se temperaturat përvëluese të këtyre ditëve i kanë marrë jetën të paktën 6 personave.”- njofton “Reuters”.