Katër apo më shumë klube me problem të frikshme financiare, një pjesë që rrezikojnë të mos marrin licensimin pas dy ditësh, në skadimin e afatit, e prapaskenat e një ngjitjeve apo zbritjeve të shëmtuara në Superiore. Ka edhe të tjera, por edhe kaq janë ingredientë të mjaftueshëm për ta bërë elitën e futbollit në vend një kaos total, me pasoja të forta në imazh dhe preferencat e lojtarëve. Është e qartë se tashmë kampionati është kaluar, në mos ende në hierarkti, por në zgjedhjet e lojtarëve edhe nga Superliga Ipko, kampionati i Kosovës, që po rrëmben me shpejtësi lojtarët që kanë prishur kontratat me klubet e tyre për tu sistemuar aty ku futbolli, mund të mos ketë ende më shumë kualitet, por ka më tepër rregullsi.
E në këtë rregullsi futen të gjitha, nga mënyra sistematike e organizimit, e deri në korrektësinë e pagave, gjë që duke marrë në konsideratë cfarë ndodhi në sezonin e kaluar me Flamurtarin, Luftëtarin apo edhe Vllazninë hyn në prioritetet e futbollistëve kur bëjnë zgjedhjen. Gjilani ka marrë gati 7 lojtarë, të fundit që u thirrën nga Gentian Mezani, edhe ai trajner nga Superioria, kanë qenë Gerhard Progni e Tomislav Busic. Klubet kosovare e kanë kuptuar momentin e tyre të favorshëm dhe përforcimet i kanë bazuar tek Superioria, duke i kthyer reston klubeve shqiptare, me busullën që tregon tashmë shigjetën nga Kosova. Edhe Sebino Plaku është aty tek Liria, e po mbyllje të akordit me Prishtinën është edhe Ditmar Bici, qendërmbrojtësi shtatlartë, që pasi ka likuiduar cështjet kontratuale me Teutën ka ndjekur rrugën, që po kthehet tashmë në modë…destinacioni Kosova.