Policia e Durrësit ka shoqëruar 17 persona që mund të kenë dijeni mbi ngjarjen e rëndë të mesditës së djeshme, ku mbeti i vrarë Feriz Bardhi, baba i dy fëmijëve.
Pista kryesore qe po udhëheq hetimet mbi krimin është “larja e hesapeve”, për shkak të konflikteve mes grupeve rivale në fushën e trafikimit të narkotikëve. Megjithatë, nuk përjashtohen as motivacioni i konflikteve personale të viktimës me autorët e krimit.
Krimi ndodhi në lagjen 18 të qytetit bregdetar, pranë degës së “Kryqit të Kuq”, ku viktima banonte me familjen e tij. Dyshohet se viktima ka hapur derën e banesës, pasi kanë trokitur autorët që kanë qëlluar mbi të me breshëri automatiku.
Pak orë pas ngjarjes, poshtë Urës së Gjoles në Fushë-Krujë u gjet i djegur një automjet i tipit “Benz”, brenda të cilit janë gjetur armë që dyshohet se janë përdorur në vrasjen e Bardhit, i cili ka qenë arrestuar në vitin 2012 nga autoritetet policore italiane në Askoli, kur u kap me një sasi prej mbi 700 gramë kokainë.
Grupi hetimor po vijon punën për të kryer zbardhjen e plotë të rrethanave dhe shkaqeve të ngjarjes.