Pak vendime për tu marrë, me vetëm Superioren në aktivitet, por Disiplinori ka bërë të qartë se do të jetë me dorë të hekurt kundër cdo sjellje antisportive. Kartoni i kuq në ndeshjen debutuese mes Partizanit e Kukësit do ti kushtojë dy javë pezullim Theophilus Solomon dhe Bruno Lulajt.
Dy lojtarët kanë qenë protagonistë të një episodi të pakëndshëm, ku lojtari i të kuqve provokoi me kokë mbrojtësin e Bluve që reagoi duke e shtyrë nga prapa. Në fakt lojtarët e kanë kryer një javë pezullim në javën e dytë, por nuk do të jenë të gatshëm për teknikët Franco Lerda e Shpëtim Duro edhe në ndeshjet e fundjavës respektivisht kundër Flamurtarit dhe Laçit.
Vendimi i Komisionit të Disiplinës së FSHF datë 30.08.2019
1. Lojtari i FK “Partizani”, Solomon Theophilus, për lojë të rëndë ndaj kundërshtarit, në bazë të Nenit 47/1/b të KDS, dënohet me 2 (dy) ndeshje pezullim nga aktivitetet.
2. Lojtari i KF “Kukësi”, Bruno Lulaj, për lojë të rëndë ndaj kundërshtarit, në bazë të Nenit 47/1/b të KDS, dënohet me 2 (dy) ndeshje pezullim nga aktivitetet.
3. KF “Tirana”, për sjellje të gabuar të spektatorëve, duke hedhur sende në terrenin sportiv, në bazë të Nenit 65/3/c dhe Nenit 65/4/a të KDS, dënohet me gjobë në masën 50.000 (pesëdhjetëmijë) lek.
Kundër vendimit lejohet ankim brenda 3 (tre) ditëve përpara Komisionit të Apelit.