Me mijëra rusë kanë mbushur sheshin qendror të Moskës për të kërkuar zgjedhje të lira për bashkinë e kryeqytetit, duke sfiduar urdhrin e policisë që parashikon ndalimin e manifestimeve.
Demonstratat, që kanë vazhduar javë pas jave, kanë tejkaluar për nga kohëzgjatja edhe ato të viteve 2011 e 2013, kur me mijëra qytetarë dolën në shesh dhe akuzuan Kremlinin për vjedhje të votimeve.
Protestuesit kanë kërkuar që kandidatët e opozitës të lejohen të marrin pjesë në zgjedhje. 30 prej tyre, që kryesisht kandidojnë si të pavarur, janë hequr nga lista nga Komisioni Qendror i Zgjedhjeve, me pretekstin se regjistrimi i tyre ishte kryer me firma të falsifikuara.
Bashkia e Moskës dhe këshilli bashkiak mbizotërohet nga mbështetësit e Putinit. Kremlini nuk ka reaguar, duke i konsideruar protestat si të vogla e të parëndësishme, edhe pse janë arrestuar me dhjetra aktivistë.