Seth Aaron Ator, 36 vjeç, u vra nga policia në parkun e makinave të kinemasë Cinergy në Odessa të Texas-it, të shtunën pasdite. Autoritetet thanë se ende nuk e kanë një motiv për ngjarjen e rëndë, por shtuan se ai do të kishte vrarë më shumë njerëz, nëse policia nuk do ta kishte qëlluar për vdekje.
Viktimat e agresorit janë të moshave nga 15 deri në 57 vjeç. Dëshmitarët kanë treguar se në mesin e viktimave ka edhe të rinj e studentë.
Policia thotë se fillimisht 36-vjeçari u ndalua për një shkelje të lehtë. Ndaj tij nuk kishte urdhër-arresti, por ai reagoi duke u larguar me shpejtësi nga patrulla e policisë rrugore dhe filloi të qëllonte nga makina. Ai la të vrarë 7 persona, ndër ta një burrë para shtëpisë së prindërve të tij dhe një adoleshente që kishte shkuar me familjen për të blerë një makinë.
Dokumentacioni i gjykatës tregon se 36-vjeçari ishte arrestuar edhe në vitin 2001 për një shkelje të lehtë që nuk e pengonte të blinte armë në mënyrë të ligjshme në Teksas. Për momentin autoritetet nuk kanë thënë si e siguroi ai armën luftarake që përdori për masakrën.
