Kryetari i Partisë Demokratike, Lulzim Basha, do të zhvillojë pasditen e sotme në orën 18:00 një takim me aleatët e forcës politike që drejton.
Ky takim, që do të zhvillohet në selinë blu vjen pas ftesës së kryeministrit Edi Rama për uljen në një tryezë dialogu për Reformën Zgjedhore. Në një letër publike, drejtuar krerëve të partive të opozitës joparlamentare, shefi i qeverisë kërkonte takim pa kushte për kryerjen e kësaj reforme, që figuron edhe në listën e 9 kushteve të vendosura nga Gjermania për hapjen e negociatave të anëtarësimit të Shqipërisë në Bashkimin Evropian.
Në letrën drejtuar: Lulzim Bashës, Monika Kryemadhit, Nard Ndokës, Vangjel Dules, Agron Dukës, Dashamir Shehit, dhe Fatmir Mediut, Rama shkruante se “Ju drejtohem publikisht në përpjekjen për të krijuar një hapësirë dialogu e ndërveprimi mes nesh, lidhur me një sfidë të përbashkët të një rëndësie kombëtare, Reformën Zgjedhore. Kundërshtitë tona në aspektin politik janë botërisht të njohura dhe pozicionet respektive, në raport me hapësirën institucionale të vendit po ashtu.”