Blendi Teta, 39-vjeçari i arrestuar si personi që ka dijeni mbi itenerarin e ndjekur nga vrasësit e ish-policit, Santjago Malko, pretendon se është kërcënuar me jetë.
Denoncimi është bërë nga avokati i Tetës, sipas të cilit menjëherë pas vendosjes së masës së sigurisë “Arrest me burg” nga Gjykata e Tiranës, pasi u konstatua fajtor për akuzën “moskallëzim krimi”, 39-vjeçari është transferuar për kushte sigurie më të larta në paraburgimin e një qyteti tjetër.
Mirëpo, sipas avokatit, Teta ka marrë një mesazh paralajmërues edhe pas kësaj zhvendosjeje. Mbrojtësi ligjor i Tetës shton se klienti i tij ishte i trembur edhe para prangosjes dhe për këtë arsye është vetëdorëzuar. Ndërkaq, Prokuroria nuk jep asnjë të dhënë nëse të dyshuarit të vetëm të ngjarjes, i është afruar apo jo statusi i bashkëpunëtorit.
Vrasja e ish-policit Malko, ka vënë Policinë dhe Prokurorinë përpara shumë pistash hetimore, jo vetëm për ngjarje të ndodhura në Tiranë, por edhe në qytetin e Durrësit. Pas këqyrjes se dhjetra kamerave të sigurisë, hetuesit kuptuan se viktima ishte ndjekur hap pas hapi nga dy makina, në njërën prej të cilave më pas u mësua se gjendej edhe Teta.
Rrëfimi i mëpasshëm i 39-vjeçarit zbuloi emra të të përfshirëve në ngjarje, mes tyre dy vëllezërit Leonard dhe Erlis Duka. Në kërkim janë shpallur 3 anëtarët e tjerë të “Klanit Duka”, një grupi të ri kriminal, i akuzuar për një sërë ngjarjesh kriminale. Ata janë: Ilir Selmani, Elvis Gaçaj si dhe Oltian.Loga. I implikuar në këtë ngjarje është edhe pronari i “Golf 5” gri me të cilën lëvizën autorët, Ervis Metani, që njihet nga Policia edhe si “Visi i vogël”.
Malko u ekzekutua mbrëmjen e 27 gushtit në zonën e xhamllikut në Tiranë, u ekzekutua në makinën e tij tip “BMW X5”. Ish-polici ishte pjesë e bandës së Ervis Martinajt, i njohur ndryshe si bosi i lojërave të fatit. Malko kishte gjithashtu në pronësi disa pika bastesh sportive. Ai ka qenë i përfshirë në ngjarjen e 4 tetorit 2018, ku dhe ndodhi vrasja e Fabian Gaxhës në ish-Bllok pas një përplasjeje me armë. Gjithashtu ish-polici i vrarë është përfshirë në një sherr me dy vëllezërit Lashi në vitin 2016 për një borxh prej 1 mijë eurosh. Megjithatë, pavarësisht kësaj ngjarjeje të rëndë, Santiago Malko ka qenë pjesë e Inspektoriatit të Mjedisit dhe Pyjeve, ku ka punuar si inspektor edhe pse ka qenë i shpallur në kërkim.