12 gola në katër ndeshje me tre fitore vendase e një barazim. Teuta i falet Kallakut për tu kthyer tek fitorja, duke i treguar edhe njëherë Kukësit sa e vështirë është Niko Dovana për verilindorët. Skuadra e Duros duhet të ruante hapin e kryesuesit, por ndoshta mendja shumë shpejt tek derbi, ende pa fituar ndeshjen e tyre, e mungesat e rëndësishme të Ethemit e Mustës i ndëshkuan me një 1-0 që ka lënë shije të hidhur tek tekniku Duro.
Shpërthen në polemika tekniku i Bluve ndaj Enea Jorgjit, duke u kthyer të kujtojë edhe episode e mëparshme që kanë penalizuar kuksianët: “Nëse është me lente zmadhuese, ka qenë në gatishmëri arbitri. Kjo është një situatë, edhe nëse e ka prekur pak këmbën, që nuk është rast goli. Këto janë ato penalltitë, që arbitri me zor pret t’i japi, ka qejf. Edhe në Ballsh, edhe këtu, e njëjta gjë. Nuk po di çfarë të them. Më vjen keq, tani po e shoh, është nga ato penalltitë që do arbitri t’i japë, çfarë të them unë…”
Fitore e madhe e Bylis që po rezulton, ashtu si mendohej, surpriza më e bukur e kampionatit. Pesë rezultate pozitive radhazi, ku e fundit ishte ndaj Flamurtarit, kundërshtar mes një mijë e një problemeve: vetëm një barazim dhe pesë humbje në gjashtë ndeshjet sezonale dhe tani cështja bëhet gati edhe më e vështirë. Qardaku hapi serinë e golave në të 30 e kaq duhej që Flamurtari të mbytej në Ballsh, duke u fshikulluar nën goditjet e Goxhaj e Ntepe në pjesën e parë. Bylis bëri cfarë deshi me lojtarët vlonjatë dhe humbja mori përmasa nga golat e Guindo në minutën e 72-të, ndërsa 3 minuta më vonë, Ntepe realizoi pas topit të dhënë nga Peposhi. 11 pikë Bylis për momentin që ndodhet në pozita komode në tabelën e klasifikimit, ndërsa situata te Flamurtari është emergjente.
Në Gjirokastër, Luftëtari i shkoi pranë suksesit të dytë në këtë fillim kampionati, por Laci shpëton vetëm në fund me një 1-1 që mban në telashe Starovën. Kurbinasit me 5 pikë janë të parafundit dhe nuk ishte kjo idea për skuadrën e krijuar nga bardhezinjtë. Gjirokastritët në anën tjetër kanë nisur të marrin pikë dhe dalin të pamundur për të tretën javë radhazi.