I dënuari me 20 vjet burg, Gëzim Toma, ka tentuar të arratiset nga burgu i sigurisë së lartë në Peqin.
Mësohet se arratisja e mbetur në tentativë është pikasur në kohë nga rojet e burgut dhe Toma është kthyer sërish në qeli.
I dënuari ka tentuar të arratiset edhe gjashtë vjet më parë nga burgu i Drenovës, për t’u larguar më pas drejt Greqisë, nga ku u ekstradua në fillim të këtij viti.
Për këtë arsye, krahas dënimit për veprën e rëndë kriminale të vrasjes, mbi Tomën është provuar fajësia edhe për vjedhje me dhunë dhe arratisje nga burgu.
Kush është Gëzim Toma:
Gëzim Toma ka qenë duke vuajtur dënimin në burgun e Drenovës për veprën penale “Vrasja me dashje” kryer në bashkëpunim, si autor i vrasjes së një 25-vjeçari, ngjarje e ndodhur në Krastë, Martanesh.
Toma u arrestua në fshatin Elaptora, pranë Kosturit në Greqi, teksa përpiqej t’i shpëtonte gjurmimit nga forcat e rendit, dhe u ekstradua drejt Shqipërisë. ©Lapsi.al