1-vjetori i vrasjes së Kacifas, “Proto Thema”: Shqipëria i trembet “agresionit” të nacionalistëve grekë

Më datë 26 tetor pritet që në Shqipëri të mbërrijnë ekstremistë grekë për të zhvilluar një ceremoni përkujtimore për nacionalistin grek, Kostandin Kacifas.

Ky informacion bëhet i ditur nga e përditshmja greke “Proto Thema”, që shton se sipas saj nacionalistët shqiptarë po përpiqen të krijojnë një klimë tensioni në përkujtimoren e Kacifas.

“Përmes mediave sociale, nacionalistët shqiptarë u bëjnë thirrje bashkatdhetarëve të tyre që të reagojnë ndaj hyrjes së ‘ekstremistëve’ grekë në Shqipëri për përkujtimoren e së shtunës në mëngjes.”- shkruan “Proto Thema”.

Duke cituar disa media elektronike shqiptare, e përditshmja shkruan se në Shqipëri i “frikësohen agresionit grek”.

Vrasja e Kacifas:

Në prag të zhvillimit të përvitshëm të festës së Greqisë më 28 tetor 2018, të shtëna me armë tronditën zonën. Shërbimet e Policisë, të stacionuara në qendër të fshatit për mbarëvajtjen e festës, identifikuan se personi që kishte qëlluar ishte Kacifa, i cili hapi zjarr ndaj efektivë sapo pa që po afroheshin në drejtim të tij.

Policia rrethoi zonën ku përsëri Kacifas ka hapur zjarr në drejtim të efektivëve që po e ndiqnin. 35-vjeçari  u fut në thellësi të fshatit ku forcat “Shqiponja” dhe shërbimet e tjera të Drejtorisë Vendore të Policisë vijuan krehjen e zonës për të bërë të mundur kapjen e tij.

Në ndihmë të shërbimeve të Policisë së Gjirokastër, shkoi dhe një helikopter i Ministrisë se Brendshme dhe forcat speciale të RENEA-s nga Tirana, që bënë të mundur edhe lokalizimin e autorit, që pasi nuk iu pergjigj thirrjes për t’u dorëzuar, mbeti i vrarë  pas një shkëmbimi zjarri. ©Lapsi.al