• |
ide | kryesore

Video/ Të parët në javën e fundit të fazës së parë: Partizani thyen 3-1 Skënderbeun

F1, Sport, Video

Në krye të kampionatit… kampionët në fuqi të Partizanit janë rikthyer aty mbyllën kampionatin e kaluar, pikërisht në përfundim të fazës së parë, pas fitores 3-1 ndaj Skënderbeut në Selman Stërmasi. Lerda duhet të bënte pa Solomon, rikthimi i Romeros nga skualifikimi nuk i hoqi vendin e titullarit Telushi, ndërsa e gjithë strategjia e menduar e Dajës për të bllokuar kryeqytetasit u rrëzua në minutën e tretë, kur Belica u ngrit mbi të gjithë për të dërguar në rrjetë krosimin e Trashit nga goditja e këndit.

Partizani dominoi mesfushën, e asistuar në mënyrë konstante nga Trashi e Mala, tentoi golin me Çinarin, arma fituese në Shkodër, por e gjeti me Telushin, në një goditje perfekte dënimi. Mesfushori i njohur për goditjen potente, befasoi Kolicin me një trajektore inteligjente në minutën e 19, që e vuri ndeshjen në rrugën që dëshironte Lerda. Italiani po merr tani frytet e një ndryshimi taktik, që i ka dhënë tjetër fizionomi skuadrës.

Mungesat e Muzakës apo Krasniqit ndikuan në lojën e Skënderbeut, që bëri pak për të impenjuar të kuqtë, me Bregun që i sëmurë nuk vazhdoi dot as deri në pushim lojën. Por në dhomat e zhveshjes korcarët futen me optimizmin e marrë nga goli i Gripshit në minutën e 44: sulmuesi dhuroi spektakël brenda zonës dhe me një goditje precize mposhti Hoxhën. Partizani u mundua të kthehej në hapat e tij, në pjesën e dytë e pas një goditje të Dajës nga distanca, Cinari përmirëson kuotat personale, me golin e dytë radhazi brenda katër ditësh. Goli i minutës së 60 praktikisht vendosi fatet e lojës, me Skënderbeun që ndoshta kishte dëshirën por jo mundësitë. Të rinjtë nuk mund ti lejonin Dajës, më shumë se një tentativë të drojtur ofensive, me teknikun që i frikësohej më shumë një goleadë, për mënyrën se si ishin kombinuar gjërat.

Suksesi i dytë në katër ditë për të kuqtë e Lerdas, të cilët tetori i ka gjetur me një marsh më shumë, katër rezultate pozitive radhazi, gjashtë gola të shënuar në dy ndeshjet e fundit dhe vetëm dy të pësuar. E tani janë të parët…

Lini një Përgjigje

Adresa juaj email s’do të bëhet publike.

Kthehu