E përditshmja financiare britanike “Financial Times” ka hedhur dyshime mbi lidhjen e mundshme të kryeministrit italian, Giuseppe Conte, me skandalin financiar që pak javë më parë përfshiu Vatikanin e që çoi në pushimin nga puna të 5 funksionarëve të lartë administratës financiare të Sekretarisë së Selisë së Shenjtë.
Conte ishte një akademik në Firenze, pak i njohur, kur në maj të 2018-s u punësua për një konsulencë ligjore nga “Fiber 4.0”, një grup aksionistësh të përfshirë në një luftë financiare për të kontrolluar shoqërinë italiane të telekomunikacionit “Retelit”. Investitori kryesor i “Fiber 4.0″ ishte “Athena Global Opportunities Fund” me një fond prej 200 milionë dollarë financuar i gjithi nga Sekretaria e Selisë së Shenjtë e i administruar nga financieri italian, Raffaele Mincione.
Por, aksionistët e shoqërisë “Retelit” preferuan të votojnë pro dy investitorëve të huaj duke lënë jashtë grupin e investitorëve italianë.
Në konsulencën e tij ligjore, avokati Conte shkruan se kjo votë mund të anullohet vetëm nëse qeveria italiane ushtron të ashtuquajturën normativë “Golden Power” (fuqia e artë), e cila në bazë të ligjit të vitin 2012 aplikohet ga shteti italian ndaj kompanive private të konsideruar me rëndësi strategjike kombëtare.
Pak ditë më vonë nga kjo konsulencë, Conte u zgjodh kryeministër i Italisë e në mbledhjen numër 2 të Këshillit të Ministrave merret vendimi i aplikimit të “Golden Power”-it ndaj shoqërisë italiane të telekomunicacionit “Retelit”, që aksionerët kishin vendosur t’ia shisnin kompanisë gjermane “Shaleholder Value Managemnet e libianes Lybian Post Telecomunication”, e duke hedhur kështu poshtë vendimin e tyre.
Me një notë zyrtare të shpërndarë gajtë natës duke u gdhirë 28 tetori 2019, zyra e kryeministrisë italiane ka reaguar ndaj artikullit të “Financial Times” duke nënvizuar “se gjatë vendimit të marrë nga këshilli i ministrave më 7 qershor 2018, për ushtrimin e “Golden Power” ndaj Retelit, kryeministri Conte nuk ka qenë i pranishëm në këtë mbledhje pasi ishte i impenjuar në samitin e “G7”-s në Kanada. Conte nuk ka asnjë raport, nuk e ka takuar e nuk e njeh zotin Raffaele Mincioni. Ishte punësuar për të dhënë një konsulencë ligjore e nuk kishte dijeni se ky grup aksionistësh kishin si referencë një fond investimesh mbështetur nga Vatikani”, përfundon nota zyrtare e Kryeministrisë Italiane.