Tensione të mëdha për ndeshjen, e vlefshme për javën e katërt të Europa League, mes Lazio e Celtic. Sipas asaj që raportohet nga Il Messaggero, dy tifozë të Celtic jenë sulmuar me thikë, ndërsa gjendeshin në ambjentet e një Pub-i irlandez në kryeqytet. Sulmi ka qenë i shpejtë me protagonistë disa ultras të Lazio që kanë goditur duke plagosur një 52-vjeçar e një 35-vjeçar, tifozë skocezë. Sipas rindërtimit të situatës, shtatë apo tetë ultras të Lazio kanë goditur dy personat, duke u bazuar vetëm në aksentin anglez të viktimave. Dy skocezët e plagosur (në mënyrë jo të rëndë) janë dërguar në spitalin Umberto 1 të Romës.
Skocezët kanë marrë ndihmën e shpejtë në kohë të shkurtër ndërsa, në vend, kanë mbërritur forcat e rendit për të vendosur qetësinë. Një dëshmitar okular ka treguar për The Scottish Sun, se si ultrasit e Lazios bënë sulmin: “…mbinë nga hiçi. Askush nuk po bënte gjë të keqe. Mbështesnin Lazio dhe kishin fytyrën e mbuluar me maska”.
Episodi i radhës i dhunës që njollos botën e futbollit. Pak orë nga një ndeshje shumë delikate nga pikëpamja sportive, me skuadrën e Simone Inzaghi e detyruar të fitojë për të mbetur në garë për kalimin në fazën e eliminimit direkt të Europa League. Duke parë atë që ndodhi në mbrëmjen e së mërkurës, masat e sigurisë do të vijnë duke u shtuar në mënyrë të menjëhershme. Janë të shumtë tifozët e Celtic që kanë vendosur të ndjekin skuadrën në këtë transfertë italiane në “Olimpico”. Flitet për 9000 ultras. Ndeshja është në program në ora 18:55. Vëmendje maksimale për të shmangur gjithçka që mund të ndodhë tjetër.