• |
ide | kryesore

Astiri, hakmarrja e ftohtë e Kryeministrit

Blog



Nga Ermal Mulosmani

Një dukuri e paligjshme, nëse përsëritet një numër të konsiderueshëm rastesh, kthehet në të ligjshme. Nëse një tabelë thotë “Ndalohet Duhani” por në lokal të gjithë pijnë duhan, atëherë ndërro tabelën. Edhe vetë ligji ose e drejta është ndërtuar mbi bazën e këtij ligji themelor të filozofisë. 69 vota janë humbëse por 71 janë fituese në një votim me 140 anëtarë.

Me ardhjen e demokracisë dhe rënies së peshës së ligjit dhe të shtetit në jetën e individit, mijëra njerëz të varfër u shpërngulën nga zonat malore të Veriut dhe Jugut të Shqipërisë për në periferinë e Tiranës. Aty ata filluan të ndërtonin shtëpitë e veta në tokën e shtetit apo ish pronarëve pa pyetur askënd. Dukuria u bë jashtëzakonisht masive dhe u kthye në një hambar votash për ata që kujdeseshin në sjelljen e tyre ndaj shkelësve të ligjit.

Kryeministri i sotëm, atëkohë Kryetar Bashkie i Tiranës, nuk bënte pjesë në dashamirët e këtyre shkelësve të ligjit. Ai reshtohej në barrikadën e të drejtës dhe përdorte edhe terma si “Bathorizimi”, “Rrumpallhane” e mjaft shprehje të tilla që i jepnin atij petkun e njeriut të rregullit, atij që do t’i vinte kufirin te thana kaosit urban sapo të vinte në fuqi. Me thënë të drejtën e pëlqeja qëndrimin e atëhershëm të zotit Rama.

Më i dalluar se ai në qëndrimin anti-rrumpallë ishte vetëm Artan Lame, një vartës i përhershëm i tij.

Ndërkohë, numri i të paligjshmëve që ndërtonin vinte gjithnjë  e në rritje duke u bërë ata përcaktuesi i fituesit të zgjedhjeve. Ky moment shënoi edhe ndryshimin e zotit Edi Rama.

Kur diferencën e bën i paligjshmi, bëhu me të, nuk ke rrugë tjetër! Madje edhe kur ky është armiku më i madh i yti!

Përnjëherë i la talljet, madje ndryshoi kryekëput, 180 gradë, natyrën e batutave të tij. Edi i “rrumpallhanes” u harrua dhe na doli Kryeministri i ri që deklaronte “Edhe Enver Hoxha të vijë nuk ua prishë dot shtëpitë”. Duke qenë se vesi i talljes i del veç me shpirtin, ai gjeti pikërisht kundërshtarin më të madh të legalizimeve, Artan Lamen, për ta bërë hiç më pak sesa “Kryetar të Legalizimeve të Shqipërisë”. Madje, në një nga takimet me të interesuar, deklaroi “Ju nuk do lëvizni fare, as do paguani asgjë, do vijë Lamja në shtëpi e ua bën dokumentet”.

Pra, Kryeministri, po thoshte që ndërtuesit e paligjshëm të shtëpive të rrinin në shtëpi se vjen Lamja e ua bën dokumentat, madje pa pagesë. Ndërsa unë, kur bleva apartament me paratë e mia, më duhet të rrija në radhë në hipotekë, të paguaja taksa, tarifa, bakshishe, i paligjshmi priste atje ardhjen e Lames me dokumenta. Kur e dëgjoja mu kujtua origjinal Enver Hoxha dhe Reforma Agrare.

Një vlug inati më kaploi të tërin por ç’ti bëja, isha në anën e pakicës, isha me rregulin e ligjin  kundër rrumpallës e  kaosit…

Ahh, harrova. Kryeministri nuk e jep dot krejt lirë këtë ndryshim 180 gradë. Se siç e thamë më lart vesi del me shpirtin. Ai kërkoi prej përfituesve të duronin talljen e tij. Kaq pak për një shtëpi ishte e mirëkuptueshme nga ata. Një vesh shurdh e një sy qorr kur i thonë llafit, të gjithë u bënë pre e arrogancës e talljes Kryeministrore, me transmetime live, të gjata tre orëshe, që po konkuronin programet banale të humorit. Mund të jetë i vetmi Kryeministër që tall live qytetarët e tij duke bërë të qeshin edhe ata vetë, Lamen, deputetët e gazetarët e pranishëm. Kjo dhunë verbale ishte hakmarrja e tij për detyrimin që i bënë “bathoristët” atij të ndryshonte qëndrim.

Por kaq ishte fare pak. Ai nuk është nga ata që fal kollaj. Duhej gjetur një mënyrë, një viktimë që do paguante për të gjithë. Këtyre do ua nxirrte ujin e zi. Dhe për këtë u zgjodhën banorët e Astirit në Unazën e re të Tiranës.

Gjithë mllefin e akumuluar të Kryeministrit për tapitë e ndara live do t’i paguanin këta gjynahqarë. Ata nuk ndryshojnë asgjë nga të paligjshmit e parë. Ata kanë ndërtuar pa pyetur njeri aty ku u është shkrepur duke ushqyer shpresën nga premtimi i famshëm kryeministror “Edhe Enver Hoxha po të ngrihet nga varri nuk do ua shembë shtëpitë”. Madje mund të jenë dy vëllezër, në distancë 20 metër nga njëri tjetri. Njërit ia çon tapinë Lamja në shtëpi, të dytit që ka ndërtuar me po të njëjtat parime i vjen INUK-u për t’i prishë shtëpinë. Po si shpjegohet dot që Kryeministri nuk ndjek të njëjtin etalon për të dy? A nuk mundet t’i dëmshpërblejë këtë gjynafqarin që i ra rruga dhe i duhet prishë shtëpia? Dhe kush pa, ai që jep 18 milionë Euro për një kilometër! Por tjetër kund është lepuri.

Tani, këta që do u prishen shtëpitë janë pak. Ata nuk prishin punë në thesin e madh të votave ndërkohë që i shërbejnë mjaft Kryeministrit për hakmarrje! Gjithë inatin e tij të vjetër ndaj “Rrumpallhanes” ose “Bathorizimit” do ua nxjerrë për hundësh këtyre gjynahqarëve…



5 Comments

  1. Km ska Asgjë personale në këtë biznes.
    Thjesht ca miliona euro për të zhvilluar në ndërtim.
    Unë ti dhe kushdo, jemi grimca të pluhurit të unazës së re.

  2. Cdo gje e vertete por e shkruar nga tropojane te berishes nuk ka besueshmerine e duhur..me vjen keq..

  3. Daku po pronari i ligjshem i atij trualli qe s’ka marr asgje deri tani pervec shpenzime te pafund dyerve te gjykatave dhe kohe e shkuar dem a duhet te demshperblehet? Keto zoterinj qe ndertuan aty te pyetnin a ka plan zhvillimi se qe me 89 parashikohej te kalonte unaza e madhe.Keto qe sot po mbron dhe qe kane marre nje pagese te mire per demshperblim e kane shfrytezuar per 20 e ca vjet ate prone jo te tyren.Gjithe ato para qe iu dhane per demshperblim shkelesve te ligjit ku dalin? Nga parat e taksapaguesve ku me ato leke mund te behej nje shkolle me e mire nje rruge me e mire nje investim plus tek UK etj etj se kete shtet s’ke ku e kap. Atehere mire qenkerka une dhe ti qe s’e shkela ligjin ishim budallenj kurse hajdutet jane te mencur.Une paguaja dritat rregullisht kurse hajdutet e vidhnin dhe humbjet dilnin nga xhepat e mi prap isha budalla une kurse keto te mencur.Une paguaj te gjithe taksat jam budalla kurse keta te mencur.Sipas kesaj llogjike po dal e po ndertoj ne bulevardin Deshmoret e Kombit dhe te me demshperblej shteti me cmimin e tregut.Ore ketu eshte vra o zot.Kot s’thone keto 30 vjet u ulen malet e u ngriten halet.Hajduti nderohet e respektohet shume me shume se i ndershmi

  4. Ore zoteri pse nuk na e sqaron ne asnje rresht se kush jane shkaktaret e kesaj katrahure,te cilet duan te rikthehen ne pushtet duke veshur lekuren e qengjit dhe duke u hequr si shpetimtaret e kombit!!!

Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *