Pesë minuta të cmendura në fundin e sfidës në Gjirokastër kanë fundosur shpresat e Luftëtarit për të ngushtuar diferencën me zonën e shpëtimit në kampionat. Vllaznia ndërtoi një strategji qendresë të finalizuar me golat e Malotës e Likës, që i japin Jonuz tre pikë sigurie. Tekniku i kuqebluve bëri të mos ndihet mungesa e Hygor, u kujdes që prapavija të rezistonte, me një ekuilibër në mesfushë, për të dalë pa dëme nga presioni i fushës i gjirokastritëve e duke kundërsulmuar në mundësinë e parë, për ti mbajtur në panik kundërshtarët.
Në përfundim të sfidës së fituar, që i garanton qendrimin në Superiore Vllaznisë, tekniku Jonuz ka marrë të gjitha meritat e suksesit: “Ishte strategjia ime që të luanim për 0-0 dhe të ishim të kujdesshëm. Fusha ishte e vështirë, në pjesën e dytë hodha dy sulmuesë në fund. Djemtë ia dolën në fund dhe i përgëzoj për këtë. Është ende të flasim për objektiva, skuadra ka 5 muaj që është krijuar. Në pjesën e dytë aktivizova lojtarët më përvojë, sepse e dija që do të lëshonin lojtarët e Luftëtarit”.
Me vetëm 8 pikë, gjërat për Marantas përkeqësohen kur diferenca me shpëtimin bëhet humnerë, për më tepër që deri në janar, ka ende ndeshje për tu luajtur.