Titulli kampion kalon edhe përmes mini-fazës përgatitore që skuadrat do të kryejnë përpara rifillimit të kampionatit dhe Kukësi nuk ka ndërmend të humbasë kuota në këtë pikë. Madje ndryshe nga të gjitha vitet e administrimit Gjici, ka zgjedhur një strategji të re: atë të vazhdimësisë. Blutë kanë qenë të famshëm për lëvizje të forta, edhe kur bëhej fjalë për merkaton e janarit, që duhet të jetë, në më të shumtën e rasteve, riparuese. Kështu, konfirmimi i 23 lojtarëve aktualë është një risi e vërtetë tek kuksianët, që kanë vërtetë në plan të bëjnë goditje, por vetëm për të korigjuar qendrën e mbrojtjes.
Në identikitin e Shpëtim Duros është një lojtar i fortë fizikisht e shtatlartë, por idea, edhe e teknikut, është të ruhet grupi. E ndërkohë, për të marrë ngarkesën e duhur Kukësi, është duke punuar me dy seanca stërvitore ditore, por është kondicionuar nga koha e keqe në Antalia, që e ka detyruar skuadrën të braktisë fushën e të futet në palestër. Kondicioni fizik ka qenë prioritet i obliguar për Kukësin, që shpreson të jetë gati për miqësoret e programuara gjatë qendrimit në Turqi.
Kështu, synohet që skuadra të ketë tre teste, një prej të cilave është zyrtarizuar që është kundër Kaiseryspor. Duro i konsideron shumë të rëndësishme përballjet në këto miqësore, që do ti tregojnë teknikut formën e të tijve, por edhe potencialin që ka realisht formacioni që udhëheq kampionatin, gjë që do të donte ta ruante kështu deri në fund…