Partizani ka fituar tre ndeshje radhazi, por asnjë prej tyre nuk ka qenë aq bindëse sa për ta konsideruar skuadrën jashtë krizës (një fitore në tetë ndeshje). I fundit nga tre takimet e fituara ishte 3-1 kundër Besëlidhjes, që fatkeqësisht i eleminoi të kuqtë nga Kupa e Shqipërisë. E megjithatë Adolfo Sormani nuk e sheh skuadrën në krizë: “Nuk jam dakord që skuadra është në një moment të vështirë – kundërshtoi italiani -. I respektoj opinionet, por unë i shoh në një kënd ndryshe. Skuadra gjithmonë ka rritje. Në 3 ndeshjet e fundit, kemi pësuar 2 goditje në portën portë ndaj kam të gjithë motivet e mia të mendoj që skuadra është në rrugën e duhur”.
Këndvështrimi i teknikut në fakt nuk e nxjerr Partizanin nga vështirësitë, sepse me njërin objektiv të eleminuar dhe shtatë pikë diferencë nga vendi i parë i Kukësi në kampionat, një humbje të dielën në Laç do ta bënte që mundësia e vetme për Sormanin të mbetej prezantimi në Europa League sezonin e ardhshëm.
Italiani e di mirë dhe pret një ndeshje agonistike nga të tijtë, në një fushë që nuk i sjell pothuajse asnjëherë fat: “E dimë që na pret një ndeshje shumë e vështirë, ndaj një kundërshtari agresiv – shpjegoi tekniku -, por mendoj që tashmë skuadra është rritur dhe zhvillon një lojë tepër intesive. Jemi përgatitur edhe psikologjikisht, pasi e dimë mjaft mirë se çfarë ndeshje na pret në Laç”.