• |
ide | kryesore

Letra/ Dialogu shqiptaro-serb i shtyrë nga lobistët e Beogradit. Nuk ka vemendje për Kosovën në SHBA

-Instant, Kryesore, Lajme



“Nuk është e mençur të besosh që Uashingtoni i kushton “vëmendje të plotë” procesit të errët të dialogut Kosovë-Serbi. Shumë pak vetë në ëashington janë në djeni të asaj që po ndodh, dhe më pak brengosen për këtë nismë të shtyrë nga lobistët e Serbisë në një administratë që kujdeset pak për Ballkanin dhe aspak për Kosovën”

Ky është thelbi i një letre që analisti amerikan dhe profesori i Universitetit “John Hopkins”, Daniel Serwer, i ka drejtuar presidentit të Kosovës.

“Kosova duhet të jetë e gatshme të largohet nga një marrëveshje e keqe në mënyrë që të marrë një të mirë, në kohën e duhur dhe me ndihmën e SHBA-së dhe BE-së. Deri atëherë, përmirësimet në rritje janë gjithçka që mund të shpresohet. Arti i qeverisjes kërkon që të inkurajoni qytetarët tuaj të jenë të durueshëm. Gjëra të mira vijnë për ata që mund të presin”, ka shkruar mes të tjerash Serwer.

Presidenti i Kosovës Thaçi i ishte përgjigjur shqetësimeve të ish diplomatit amerikan Shaun Byrnes dhe vetë Daniel Serverit lidhur me dialogun Kosovë -Serbi” “I zhgënjyer kur shoh miqtë e Kosovës dhe të mi Daniel Serwer & Byrnes duke u mashtruar nga lajmet e rreme. Nuk ka asnjë marrëveshje sekrete apo çfarëdo që të jetë, ndërmjet Kosovës dhe Serbisë. Një e tillë mund të arrihet përmes një procesi transparent me lidershipin amerikan dhe ju ftoj të ndihmoni. Richard Grenell është duke bërë një punë të shkëlqyeshme”. Pak ditë më pas ai ka shtuar: “Uashingtoni ka vëmendje të plotë në dialogun Kosovë-Serbi. Është barra e brezit tonë për t’i dhënë fund konfliktit dhe hapjes së rrugës për integrimin euro-atlantik dhe prosperitetin ekonomik. Ne kemi nevojë për mbështetje për këtë proces, jo pengesa, as kundërshtime. Ka të bëjë me fëmijët tanë”.

Më poshtë letra e plotë e Daniel Serwer:

Kjo është përgjigjja ime ndaj Presidentit, të cilin e kam njohur që nga vizita e tij e parë në SHBA, pas luftës në vitin 1999:

I dashur Hashim,

Unë jam plotësisht “simpatizues” ndaj ambicieve euro-atlantike të Kosovës dhe vazhdimisht kam bërë përpjekje për këtë qëllim.

Por nuk është e mençur të besosh që Uashingtoni i kushton “vëmendje të plotë” dialogut Kosovë-Serbi, i cili ka qenë një proces krejtësisht i errët.

Pak në ëashington madje e dinë që po ndodh, dhe më pak brengosen për këtë.

Kjo pavëmendje u ka dhënë mundësinë lobistëve të angazhuar nga Beogradi të ndikojnë në një administratë që kujdeset pak për Ballkanin dhe aspak për Kosovën, të cilën e konsideron si produkt të Administratës së përçmuar të (Bill) Clintonit.

Më keq se pavëmendja amerikane dhe paragjykimi pro-serb është se populli i Kosovës dhe i Serbisë nuk dinë asgjë për atë që po diskutohet në takimet tuaja të përsëritura me presidentin (Aleksandar) Vuçiq.

Qytetarët tuaj kanë kërkuar transparencë. Unë kam kërkuar më shumë se një herë për një azhurnim. Asgjë nuk ka. Kjo ju lë “të ekspozuar” ndaj thashethemeve, të cilat nuk janë domosdoshmërisht të sakta. Vetëm transparenca që ju premtoni mund ta rregullojë atë problem.

Richard Grenell është një njeri që ka dështuar si ambasador në Gjermani dhe po dështon si Drejtor i përkohshëm i Inteligjencës Kombëtare.

Ai gjithsesi po bën një punë “mashtruese” në Ballkan, duke prezantuar marrëveshjet e vogla të transportit si hapa të mëdhenj përpara.

Ai po punon gjithashtu shumë për të bërë presion ndaj kryeministrit (Albin) Kurti me kërcënimet e tërheqjes së trupave dhe ndihmave amerikane.

Albini është i përkulur, por jo akoma i thyer përballë kërkesës së SHBA që ai të largojë taksën për mallrat serbe.

Qëllimi përfundimtar i Grenellit është shkëmbimi i tokës/njerëzve që administrata Trump po bën presion dhe ju keni treguar shenja se mund të pranoni.

Një shumicë e popullsisë suaj, përfshirë serbët në jug të Ibrit, janë kundër kësaj ideje të pakuptimtë, e cila do ta bënte Kosovën një burim paqëndrueshmërie në të gjithë Ballkanin dhe më gjerë.

Ju sigurisht që mund të më bindni se jam gabim në të menduarit se jeni gati të tregtoni pjesë të Kosovës me popullsi serbe për hapësira të Serbisë me popullsi shqiptare: jepni parlamentit të Kosovës një llogari të plotë dhe të ndershme të bisedimeve me Vuçiqin.

Kjo duhet të përfshijë agjendat, çdo draft ose propozim nga secila palë, dhe një transkriptim të plotë të dialogut në nivelin më të lartë dhe në çdo grup punues.

Pastaj kthejeni përgjegjësinë për dialogun me qeverinë, pasi Gjykata Kushtetuese vendosi dhe parlamenti tani e ka konfirmuar.

Bërja e Albinit udhëheqës (të dialogut) t’ju heq ngarkesën dhe do t’i vendosë serbët në një pozitë të vështirë, pasi kryeministrja e tyre – e favorizuara e presidentit – nuk mund të pretendojë të ketë llojin e mandatit popullor që ka Albini.

Ju jeni pa dyshim i zhgënjyer me rezultatet e zgjedhjeve që sollën Albinin në pushtet, pasi ata lanë partinë tuaj në vendin e tretë.

Por, të punosh me vendin e dytë të zgjedhjeve për të rrëzuar Kryeministrin nuk do t’i bëjë aspak mirë Kosovës.

Kjo rrezikon të ndezë një stuhi që do t’i japë fund perspektivës së pezullimit të taksës ose përparimit edhe më tej me dialogun me Serbinë.

Për një atdhetar kosovar, dhe shpresoj se kam të drejtë të supozoj se do të dëshironit të konsideroheshit si i tillë, shpejtësia nuk duhet të jetë përparësia.

Nuk ka asnjë avantazh në synimin e një marrëveshje përpara zgjedhjeve të 26 prillit të Serbisë.

Presidenti Vuçiq do të jetë më i lirë të bëjë lëshime për Kosovën pas zgjedhjeve sesa më parë. Kosova do të ishte e mençur të presë edhe më gjatë: derisa pasi amerikanët të shkojnë në votime në 3 nëntor.

Nëse atëherë ekziston një President (Joe) Biden – një mik i vërtetë i Kosovës – mund të prisni që ai të fuqizojë një të dërguar serioz për të bashkëpunuar me Evropën, diçka që Grenell nuk mund ta bëjë kurrë, sepse ai dhe Presidenti Trump “ndjejnë neveri ndaj” Bashkimit Evropian, në arritjen e marrëveshjeve serioze midis Kosovës dhe Serbisë.

Aksioni i përbashkët i SHBA/BE është një parakusht për të sjellë presion të papërballueshëm për Beogradin. Grenell as nuk po përpiqet për ta bërë një gjë të tillë.

Nëse Trump rizgjidhet, kushdo që është në pushtet në Kosovë do të duhet të “jetë i gatshëm” për të mbrojtur vendin tuaj nga sulmi i ideve të këqija të ndarjes – pëlqimet e Grenell do të vazhdojnë të gjenerohen.

Shumica e qytetarëve tuaj duan një marrëveshje me Serbinë që e njeh shtetin e Kosovës si sovran dhe të pavarur brenda kufijve të saj aktual dhe i lejon asaj të hyjë në Kombet e Bashkuara.

Kjo nuk është në ofertë akoma.

Kosova duhet të jetë e gatshme të largohet nga një marrëveshje e keqe në mënyrë që të marrë një të mirë, në kohën e duhur dhe me ndihmën e SHBA-së dhe BE-së.

Deri atëherë, përmirësimet në rritje janë gjithçka që mund të shpresohet.

Arti i qeverisjes kërkon që të inkurajoni qytetarët tuaj të jenë të durueshëm. Gjëra të mira vijnë për ata që mund të presin.



5 Comments

  1. Nje analize politike e sakt e bere nga nje burre i mençur, qe me urtesi e çiltersi te ve per shpatulla mbas murit. A do ta ndigjoj kush? Nuk besoj. Hytat e vjetra ne Kosove te UDB dhe te S.Sh.Sh jane bashkuar e po duan me e kall Kosoven.

  2. Ka pasaktesi ne analizen e tij. Lobuesi kryesor dhe hartuesi i planit per ndarjen e Kosoves eshte Soros, qe po ashtu eshte ‘Kumbari” i se majtes nderkombetare dhe financuesi kryesor i fushates se Bill Klinton, Obames, Kerrit, Hillarit. I bie qe Soros te jete edhe financuesi kryesor i fushates zgjedhore te Biden nese ai do jete kandidati i Demokrateve, dhe rezultati eshte i qarte cili do jete per Kosoven.

    1. Soros (dhe gjitë çka mbasë) ka si qëllim rrëzimin e klasës drejtuese konservatore Evropjane, Amerikane apo më gjerë që ta zëvendësoj me një klasë drejtuese tjetër.

      Shqipëria dhe Kosova vendosen këtu thejesht si një mjet për të arritur një objektivë afat-mesëm që është zmbrapsja e Serbisë e mbështetur nga Rusia. Pra, qëllimi i fundit është lufta ndaj Rusisë për ndërkombëtarët.

      Rusia, Turqia dhe Iranin janë vendet e fundit të fuqishme që i rezistojnë vizionit të tij të shoqërisës së hapur (jo se mbështes diktatorët që i drejtojnë).

      Nëse nuk beson pyete veten, përse Obama, progresist që i kanë dhenë edhe çmimin nobel të paqes dhe i mbështetur nga çdo lloj organizate paqësore ambjetaliste etj, etj, organizon një luftë në Siri që destabilizon vendet rreth tij (Turqinë dhe Iranin sidomos. Rusia kisthe baza ushtarake aty pra kuptohet)? Kuptohet që vizjonit të shoqërive të hapura i shkon për shtat edhe ç’do lëvizje emigrantësh drejtë Evropës që do shkaktonte destabilitet në të.

      Ky vizjon, nuk do shtet të pavarura, por shtete nën zgjedhën e atyre që fshihen mbas Soros. Prandaj, edhe nëse sot na mbështesin me Kosovën, mbasi të mundin Rusinë, kjo ideologji do i bëj luftë atëdhetarëve, si po bëjnë në Amerikë dhe Evropë ku i trajtojnë si të prapambetur (nuk përdoret më fjala patriot por nacionalistë dhe këta trajtohen negativisht nga medjat e majta në perëndim).

      Për ata që kujtojnë se si erdhi diktatura komuniste në Shqipëri, do ti vij në mendje që në fillimet e saj, ajo erdhi si lëvizje internacionale me qëllim heqjen e kfijëve dhe bashkimin në një organizatë ndërkombëtare (Bashkimi Sovjetik në atë kohë). Nga këtu edhe zhurmat se fill mbas lirimit nga Nazistët Shqipëria mund ti bashkohej Jugosllavisë. Ky qëllim ishte aq i dukshëm sa partizanët shqiptarë shkonin e vizitonin fshatra shqiptare në Kosovë apo Maqedoni pa problem. Priteshin si çliuesa nga vendasit por plani ishte ndryshe. Nga ana tjetër, Serbë erdhën në ndihmë të komunistave Shqiptarë, zyrtarisht për të luftuar kundër Nazistëve, por në praktikë luftuan kundër opozitarëve Shqiptarë.

      Kjo për të thënë që është e njëjta ideologji që ka ndryshuar fytyrat e aktorëve gjeopolitikë. Bolshevikët e djeshëm Rusë sotë janë Amerikanë progresistë dhe të majtë (Obama, Clinton, Macron, Renzi, Conte, Merkel, etc.). Për sa kohë mbajnë këta do egzistojnë edhe Shqiptarët.

      Nëse humbin progresistët kundrejtë konservatorëve në Amerikë apo Evropë Shqiptarët ngelen vetëm kundër armiqëve shumë më të fortë se ata (kryesisht Greqia dhe Serbia). Nëse fitojnë, Shqiptaria do mbështetet në perjudhën afat-shkurtër por do asimilohet nga kultura më dominante kur vizioni i shoqërisë së hapur do të vihet në praktikë.

  3. Brovo z. server, e ke piketuar siç duhet. Por, mos harro qe Thaçit i është premtuar amnisti per te akuzat e krimeve te luftës, gje qe ju be dhe Ramushit, por ndryshimin midis një patrioti dhe një tradhëtari e shikoni fare mire. Mos te Gjatemi kot, Thaçit i ha mendja se do gënjeje gjithmonë!

Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *