• |
ide | kryesore

Analiza/ Rexhep Qosja: Kush dhe pse u rrëzua qeveria e Kosovës

Lajme, Të fundit



KOMPLOT PARLAMENTAR

E rrëzuan Qeverinë e ndryshimit!

E rrëzuan Qeverinë e shpresës!

E rrëzuan Qeverinë e ndryshimit dhe të shpresës pa i lejuar t’i kalojë as 90 ditët e para që çdo qeverie i lejohen në të gjitha demokracitë liberale e joliberale, përpos në “demokracitë” neofashiste.

Nuk e rrëzuan votuesit. Jo.

Nuk e rrëzuan ata që zgjedhin. Jo.

Nuk e rrëzoi populli. Jo.

E rrëzuan ata që fjalën popull s’e përmendin më, ata që popullit nuk i bëjnë të mundshme as të shihet e as të dëgjohet më!

E rrëzuan ata që përgjegjshmërinë për shoqërinë, si u pa, e kanë shumë më të vogël se levërdinë vetjake.

Se do të bëjnë çmos për ta rrëzuar Qeverinë e ndryshimit dhe të shpresës e treguan ditën e formimit të saj në Kuvendin e Kosovës. Atë ditë, në atë mbledhje, u dëgjuan fjalë sulmesh, fjalë fyerjesh dhe fjalë kërcënimesh kundër saj dhe sidomos kundër kryeministrit të saj.

Kush janë ata që e rrëzuan Qeverinë?

Janë ata që i tmerroi fitorja e Lëvizjes që e krijoi qeverinë – fitorja e Vetëvendosjes.

Janë edhe ata, në të vërtetë prijësit e atyre, që e krijuan koalicionin me ta për krijimin e asaj Qeverie.

Ata e rrëzuan, në të vërtetë ata e prenë në besë.

Pse e rrëzuan?

Pse e prenë në besë?

Cilat janë arsyet e rrëzimit, e prerjes në besë të Qeverisë së ndryshimit dhe të shpresës?

Ata që e përgatitën rrëzimin, opozitarët, thonë gënjyeshëm, propagandueshëm se qeveria gjatë atyre 50 ditëve, që ia lejuan, u tregua antiamerikane dhe e rrezikoi Kosovën me sanksione që SHBA-ja gjoja do t’ia vinte Kosovës!

Pjesëmarrësit e dytë të koalicionit, në të vërtetë të parët e LDK-së, e thonë duke mashtruar opinionin se Qeveria u rrëzua, e para, pse e shkarkoi pa u konsultuar me ta ministrin e Punëve të Brendshme që vinte prej partisë së tyre dhe, e dyta, për shkak se nuk deshi të hiqte tarifën në mallrat e Serbisë e të Bosnjës.

Kryeministri i qeverisë, Albin Kurti, ndërkaq, thotë se qeveria e kryeministruar prej tij u rrëzua për shkak se ai e kundërshtoi shkëmbimin e territoreve midis Kosovës e Serbisë që është paraparë në bisedimet midis kryetarit të Kosovës dhe kryetarit të Serbisë.

Është një arsye tjetër, megjithatë, që realizuesit e rrëzimit të Qeverisë i ka shqetësuar më shumë se arsyeja e të parëve, opozitarëve, dhe arsyet e të dytëve, udhëheqësve të LDK-së.

Cila është ajo arsye?

Ajo është arsyeja që e dijnë, që e ndjejnë, që e theksojnë, që e përjetojnë shembshëm shumica e qytetarëve të Kosovës.

Qeveria e ndryshimit dhe e shpresës i çoi tmerrueshëm kundër vetes edhe ata të opozitës, edhe ata të koalicionit qeverisës kur filloi, shpejt pas konsituimit, t’i rrëgjojë, në të vërtetë t’i komprometojë privilegjet e pushtetarëve të lartë dhe partizanëve të tyre, t’i shpërbëjë infrastrukturat e eksploatimit e të zhvatjeve të Kosovës prej atyre që ishin në pushtetin e saj prej ditëve të para të pasluftës çlirimtare të UÇK-së e sidomos prej atyre që ishin në pushtet prej se Kosova u shpall shtet me 17 shkurt 2008.

Qeveria e ndryshimit dhe e shpresës i çoi tmerrueshëm kundër vetes edhe ata të opozitës, edhe ata të koalicionit kur e paralajmëroi ligjin për hetimin e prejardhjes së pasurive të të gjithë të pasuruarve politikë duke shfrytëzuar postet politike e shtetërore për të krijuar pasuritë e tyre të luajtshme e të paluajtshme në Kosovë e jashtë Kosovës.

Mund të mendohet kështu a ashtu, por nuk ka dyshim se nxitësi i rrëzimit të Qeverisë u bë kryetari i Kosovës, me dy nismat e tij – me nismën për shpalljen e gjendjes së jashtëzakonshme kur në Kosovë ende ishin vetëm 17 të prekur prej koronavirusit dhe me denoncimin në Gjykatën Kushtetuese të vendimit të qeverisë me të cilin u ndalohet qytetarëve, si u tha në atë denoncim, “lëvizja e lirë”, e garantuar me Kushtetutën dhe ligjet e Kosovës.

Mund të besohet se as gjendja e jashtëzakonshme e as denoncimi i Qeverisë në Gjykatën Kushtetuese për atë “kufizim të lirive të lëvizjes”, që sot po e zbatojnë gati të gjitha vendet evropiane në luftën e tyre kundër pasojave të koronavirusit, nuk do të ishin paramenduar sikur kryetari i Kosovës mos të ishte marrë vesh me mocionistin, domethënë me kryetarin e LDK-së. Dhe, ashtu në atë marrëveshje u bashkuan dy shqetësime të forta politike, financiare e materiale, kundër Qeverisë, kundër Vetëvendosjes dhe kundër kryeministrit Albin Kurti. Dhe, kundër qëndrueshmërisë dhe mirëkuptimit për Kosovën në botë.

Këto dy shqetësime i kishte bërë edhe më të forta, më vepruese, më ndikuese, më alarmuese, më të pandalshme, parimësia, vendosmëria dhe ndershmëria politike e Albin Kurtit që janë virtytet e tij të larta e sidomos virtyti i tij më i lartë– dhuntia mendore politike e kulturore.

Se si krejt u shpreh ky shqetësim alarmues, i pandalshëm i të shqetësuarve e pamë dje, në mbledhjen dymbëdhjetëorëshe të Kuvendit të Kosovës.

E se si krejt do të mund të shprehet ai shqetësim alarmues, i pandalshëm, në javët, në muajt a në vitet e ardhshëm mbetet të shihet.

Lëvizjes Vetëvendosje iu hakmorën dje rinia e saj, risia e saj, pastërtia e saj politike, aftëstë e saj të përgjithshme dukshëm dalluese dhe sidomos përkushtimi i saj ndaj gjendjes sociale të qytetarëve të Kosovës.

E Albin Kurtit ju hakmorën dje mençuria, ndershmëria, parimësia dhe përgjegjshmëria e tij politike, shoqërore, shtetërore dhe kombëtare.

Dhe kështu me hakmarrjen ndaj rinisë, risisë, vendosmërisë, pastërtisë, aftësive të Vetëvendosjes dhe mençurisë, ndershmërisë, parimësisë e përgjegjshmërisë së Albin Kurtit u mbytën njëherë për njëherë ndryshimet dhe besimi për të cilat votoi populli i bindur se me rininë e risitë e Vetëvendosjes Kosova do të bëhet shtet stabil, funksional, demokratik, shtet juridik, shtet që do të lirohet prej eksploatuesve, zhvatësve, shfrytëzuesve të tij të rehatuar në postet politike, partiake e shtetërore.

A do të mund të jetohet edhe më tej këtu? Më pyetën disa të rinj në mesazhet që më dërguan e në thirrjet telefonike pas miratimit të mocionit fatal kundërhistorik të votuar dje në mbledhjen e Kuvendit të Kosovës.

Varet prej jush, arrita t’u përgjigjem disave prej tyre.

Ju jeni ata që jetojnë sot e që duhet të jetoni edhe nesër në Kosovë, prandaj ju duhet ta bëni Kosovën ashtu si është më së miri për jetën tuaj.

Ju jeni sovranët e Kosovës.

Mos lejoni të bëjnë me të çka po bëjnë shfrytëzuesit dhe zhvatësit e djeshëm e të sotëm politikë të pasurive të saj e që të tillë, shfrytëzues e zhvatës politikë të pasurive të saj, po duan të jenë edhe nesër! Mos lejoni të bëjnë me të çka po bëjnë zhvatësit e mëdhenj politikë të pasurive të saj.

Etërit e vëllezërit më të moshuar të Opozitës, në vend se, në sajë të meritave që kanë për Luftën dhe në Luftën Çlirimtare, në njërën anë, dhe për shkak të mëkateve të ndryshme politike pas Luftës, në anën tjetër, t’i afronin të rinjtë e Vetëvendosjes, të tregonin gëzimin për fitoren e tyre, për gatishmërinë, për aftësitë e virtytet me të cilat do t’i shërbenin Popullit e Shtetit edhe politikisht; në vend se të bashkoheshin me ta në luftën kundër rrezikut botëror që po i kërcënohet edhe Kosovës – në luftën kundër koronavirusit, ata u treguan të kompleksuar e të frikësuar prej asaj gatishmërie, prej atyre aftësive, prej atyre virtyteve të të rinjve dhe bënë komplotin e dytë politik zëkeq ndaj tyre.

Ani ku se?

Në Kuvendin e Kosovës.

E papritur!

E paharruar!

Historikisht ndëshkueshëm e kujtuar dhe e shënuar.

Prishtinë,
26.03.2020



10 Comments

  1. Me Rexhep Qosjen si publicist ndodh nje fenomen i cuditshem dhe i pashpjegueshem (nese
    marrim te mireqene ndershmerine e tij per te cilen nuk besoj se e ve kush ne diskutim)
    -Nga njera ane eshte parimor, qellon ne shenje, eshte argumentues dhe bindes,eshte ne
    anen e se drejtes, ne anen e popullit, te ligjit e te moralit,stigmatizon dhe qellon
    pa dorashka korrupsionin dhe te korruptuarit kur eshte fjala per ne Kosove.
    -Krejtesisht ose diametralisht ne te kunderten ben kur eshte fjala per Shqiperine.
    Per Shqiperine ku korrupsioni politik , ekonomik e moral ka arritur majat duke gerryer
    haptaz e dhunshem themelet e shtetit , te shoqerise,e te bashkejeteses, korrupsion i
    “certefikuar” edhe nga organizma te specializuar nderkombetare si dhe nga Departamenti
    i Shtetit,z.Rexhep Qosja jo vetem eshte indiferent por eshte pale dhe mbrojtes pikerisht
    me mbartesit dhe ushtruesit e ketij korrupsioni.
    Cfare e ben z.Rexhep Qosja ose me sakte publicistin Rexhep Qosja kaq kontradiktor
    Pse per te njejten fenomen per njeren nga “Shqiperite tona” ( sic thote Kim Mehmeti)
    ve lupen dhe per tjetren mbyll syte dhe gojen. Kjo eshte thjesht e cuditshme.

    1. Eshte shume e thjeshte pergjigja. Qosja eshte ekstremist i majte. Eshte njelloj si ata kater vete qe kane mbetur ne bodrumet e Pallatit te Kongreseve qe edhe kur i rrjep lekuren Rama, fajin e ka Berisha. E majta rrit taksat per “barazine sociale”, por leket e mbledhura i konsideron te vetat dhe i perdor si te doje duke cuar nje pjese te mire ne llogarite personale. Qosja eshte nga ata qe shohin qimen tek tjetri megjithese trau iu ka zene syte. Nese do nje krahasim tjeter, Qosja eshte versioni mashkull i Nexhmije Hoxhes

  2. Nuk dua te paragjykoj Kurtin pasi nuk u provua ne pushtet. E vlersoj per qendrimin qe ka mbajtur edhe ndaj amerikaneve sepse mendoj se Kosova duhet te jete shtet i pavarur ose ne te kundert duhet te kete nje guvernator amerikan dhe keto i them pavaresisht se jam shume konservator dhe per pasoje i djathte. Por keto teorite se e votoi populli nuk eshte se me pelqejne fort. Kurti mori vetem pak mbi 25% te votave, pra nje vote per te qeverisur ne koalicion me nje grupim politik qe do duhej ta mbante nen fre per te mos arritur tek e majta qe perfaqeson Kurti. Prandaj, thene qe nuk jam aspak dakord me menyren se si e rrezuan, mund te thuhet me plot gojen se nuk i eshte dhene aspak nje mandat qeverises. Ketu nuk ezhte faji i atyre qe e rrezuan, por i atyre qe i dhane voten estabilishmentit kosovar dhe i bindjeve te Kurtit qe beson tek shteti i forte.

  3. Kurti mund te jete njeri i mire (edhe pse nuk e dime, por pone konsiderojme te tille), por me sa shikova nuk eshte nje person i afte, as intelligjent, sepse smund te besh lufte me te gjithe pa pasur forcat (1 deputet me shume kishte), nje person intelligjent nuk perfundon ne kosh po con te tjeret. Nese sdonte te bente koalicin te rrinte ne opozite ose te conte prap ne zgjedhje, kshu doli koqe

  4. sa per albinin dihet kush e hoqi dhe pse. por besoj shpejt do ta kuptojn edhe me mir . do kthehet edhe me fuqishem . po jo per ti pasur te gjitha enet e guzhines per vehte.

  5. Kurti në zgjedhjet e tjera do ketë për
    mendimin tim rreth 10 deputetë më
    shumë se ç’ka aktualisht.

  6. Jane hajduterit e vegjel qe i kane shitur shpirtin hajdutit te madh i binden dhe paguhen. Pastaj zevendesohen si kanacet bosh me kanacet plot.

  7. Mafia e kuqe e bere njesh me ate islamike mbeshtesin dhe mbeshteten prej Albinit. Albini nuk eshte i mbrujtur me dashurine per kombin, por me urrejtjen per progresin. Eshte thjesht nje personazh destruktiv por shume i talentuar dhe per cudi i ekuilibruar. Teresisht ne sherbim te erresires.

  8. Ja disa stalin qe ne shkrime te tjera cfare nuk kane thene per qosen komunist,serb,ekstremist,i blere nga rama I shitur te nano te enveri etj,por qosja eshte gjithmone koherent,por ju qelbesirat e saliut kur salihu e shan para mbrapa kete qosen ju suleni per te bere te njejten gje si salihu,prisni te flase salihu pastaj hidhuni ju

Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *