Edhe Diego Armando Maradona dëshiron të bëjë pjesën e tij në luftën kundër koronavirus. Legjenda argjentinas i ka komunikuar Gimnasia La Plata se është i gatshëm të ulë pagesën e tij, për të ndihmuar klubin në një moment të vështirë si ky aktual, me pandeminë e koronavirus që pezullon cdo aktivitet. Lajmin e ka bërë të ditur vetë pronari i klubit, Gabriel Pellegrino, në mikrofonët e Cielo Sports: “Ishte një nga të parët që më tha se nëse është e nevojshme të prekej rroga e tij ta kisha parasysh sepse ishte i gatshëm ta bënte. Flasim për një person që nuk po mendon për fundin e muajit, për paratë, për asgjë, vetëm të punojë e të nxjerrë Gimnasia nga pozita në të cilën ndodhet”.
Por jo vetëm, sepsé ish-Pibe de Oro është kandiduar si ndërmjetës mes drejtuesve të Shoqatës së Futbollistëve argjentinas (Faa) e klubeve për të gjetur një zgjidhje për krizën: “Janë futbollistët që lëvizin botën tonë, pa ata do të ishte një fushë bosh që askush nuk do ta shihte – deklaroi ai – Shumë djem janë dëmtuar, kanë qenë të pafat, por nuk kanë reshtur së luftuari për klubin e tyre dhe është momenti ti mbështesim, ti garantojmë rrogat. Jo të gjitha situatat janë njësoj e duhet të marrim shembull nga Gjermania: lojtarët që kanë patur fatin të fitojnë shumë para gjatë karrierës së tyre, sot duhet të ndërtojnë një fond të përbashkët për të ndihmuar lojtarët e kategorive inferiore. E njëjta edhe për ne trajnerët”, ka thënë ai për ‘Infobae’.
Maradona nuk është i vetmi mes sportistëve argjentinas që janë treguar të gatshëm për këtë opsion. Edhe Carlos Tevez, sulmuesi i Boca Juniors, ka njoftuar një ditë më parë dëshirën për të bërë pa rrogë, në ndihmë të atyre që kanë më shumë nevojë.