• |
ide | kryesore

’15 vite burg kush shkel masat kundër koronavirusit’/ 30 organizata të Shoqërisë Civile thirrje Kuvendit: Rrëzo amendamentet e qeverisë

Arkiva, Lajme, Të fundit



Organizatat e Shoqërisë Civile janë kundër ashpërsimit të Kodit Penal për qytetarët që shkelin masat kundër koronavirusit, pasi sipas tyre, cenojnë të drejtat dhe liritë themelore të shtetasve.

Në një deklaratë për media, 30 organizata i drejtohen Kuvendit të Shqipërisë, duke i kërkuar të rrëzojë në parim amendamentet e propozuara nga qeveria.

“Propozimet ligjore parashikojnë dënime tejet të ashpra që shkojnë deri në 15 vite burg dhe cenojnë dinjitetin njerëzor”, thuhet mes të tjerash në argumentimin e organizatave.

Deklarata e plotë:

Në emër të një grupi organizatash të shoqërisë civile dëshirojmë të vlerësojmë në tërësi masat e marra nga qeveria për parandalimin dhe luftën ndaj pandemisë globale #Covid19 në vendin tonë. Bazuar në deklaratat zyrtare dhe ato të stafit mjekësor, këto masa shtrënguese kanë kontribuar në një numër më të ulët të shtetasve të infektuar në Shqipëri. Shumica dërrmuese e qytetarëve është ndërgjegjësuar dhe kanë zbatuar me korrektesë masat parandaluese që janë marrë deri më tani prej institucioneve përgjegjëse, në të njëjtën linjë me qytetarët në vendet e BE-së.
Në kushtet kur organizatat ndërkombëtare të të drejtave të njeriut po rekomandojnë në mbarë globin uljen e popullatës në sistemin e burgjeve, për shkak të rrezikut të shtuar që kanë shtetasit e privuar nga liria në institucionet e mbyllura për t’u prekur nga Covid 19, në Kuvendin e Shqipërisë po diskutohen propozime ligjore që vijnë në kundërshtim me këto rekomandime.

Organizatat që ne përfaqësojmë ngrejnë sot shqetësimin për ndryshimet e fundit të propozuara në Kodin tonë Penal, të cilat dënojnë penalisht disa forma të mosbindjes së qytetarëve ndaj masave të organeve kompetente shtetërore gjatë gjendjes së jashtëzakonshme ose gjendjes së fatkeqësisë natyrore (neni 242/1) dhe disa forma të shkeljes së rregullave të karantinës për parandalimin e përhapjes së sëmundjeve infektive (242/2). Në vlerësimin tonë, dënimet penale të propozuara në Kodin Penal janë jo proporcionale, nuk respektojnë parimin e humanizmit të parashikuar në nenin 1/c të Kodit Penal si dhe cenojnë liritë dhe të drejtat e shtetasve.

Në këtë situatë emergjence, në emër të organizatave që ne përfaqësojmë i kërkojnë Kuvendit të Shqipërisë të rrëzojë në parim amendamentet e propozuara, veçanërisht nenin 242/2, bazuar në argumentat e mëposhtëm:

1 – Duke qenë se Kodi Penal bën pjesë në kategorinë e akteve që miratohen me shumicë të cilësuar, ndryshimet e tij nuk mund të bëhen në asnjë rast nga Kuvendi me procedurë të përshpejtuar. Kjo mbështetur në nenin 83, pika 3 e Kushtetutës ku ndalohet zbatimi i procedurës së përshpejtuar për shqyrtimin e projektligjeve që kërkojnë miratimin me 3/5 e votave të të gjithë anëtarëve të Kuvendit me përjashtim të ligjit për gjëndjen e jashtëzakonshme (shih Vendimin e Gj.Kushtetuese nr. 5, datë 05.02.2014).

2 – Për rastet kur qytetarët shkelin urdhërat e organeve publike për masat e marra në kuadër të gjendjes së fatkeqësisë natyrore, Këshilli i Ministrave ka miratuar disa akte normative që parashikojnë sanksione administrative.

3 – Propozimet ligjore parashikojnë dënime tejet të ashpra që shkojnë deri në 15 vite burg dhe cenojnë dinjitetin njerëzor, në kushtet kur ritheksojmë se shumica dërrmuese e shtetasve shqiptarë janë kufizuar nga liria e lëvizjes dhe po qëndrojnë të izoluar në banesat e tyre. Këto dënime janë jopropocionale, pasi çdo dënim duhet të jetë në një raport të drejtë me rrezikshmërinë e veprës penale dhe me shkallën e fajit të autorit (Shih vendimet e Gj.Kushtetuese nr.19, datë 01.06.2011 dhe nr. 9, datë 26.02.2016). Dënimi penal i çfarëdolloj natyre duhet të synojë vetëm riedukimin dhe më pas integrimin e të dënuarit në jetën shoqërore. Ndërkohë, dispozitat që kërkohen të miratohen në Kuvend kanë si qëllim vetëm ndëshkimin për efekt të parandalimit të përhapjes së infeksionit Covid 19.

4 – Në këto dispozita është shqetësues fakti që nuk bëhet asnjë dallim sa i takon subjektit që kryen këto vepra nëse është mbartës ose jo i sëmundjes infektive. Formulime të tilla mund të çojnë në vlerësime të ndryshme arbitrare dhe në cenimin e lirive dhe të drejtave të shtetasve.

5 – Këto propozime krahas parashikimit të dënimeve të ashpra parashikojnë në të njëjtën kohë dy dënime kryesore, dënimin me gjobë dhe dënimin me burgim. Sjellim në vëmendje se Gj.Kushtetuese, me vendimin nr.47 të vitit 2012 ka deklaruar antikushtetues dhënien e dënimit kryesor me gjobë, krahas dënimit me burg. Ky parashikim nuk është në proporcion me gjendjen që e ka diktuar si dhe bie ndesh me parimin e individualizimit të dënimit e si rrjedhojë me parimin e dhënies së drejtësisë nga ana e gjykatës, pasi i heq kësaj të fundit mundësinë e përcaktimit, rast pas rasti, të dënimit penal sipas rrethanave të çështjes konkrete në shqyrtim.

Në përfundim, ne besojmë se parimi i humanizmit dhe respektimit të dinjitetit njerëzor i sanksionuar që në preambulën e Kushtetutës së Republikës së Shqipërisë duhet të mbizotërojë mbi çdo nismë që shqyrtohet në Kuvend, aq më tepër në kushtet e gjendjes së fatkeqësisë natyrore.

Organizatat nënshkruese (të rënditura sipas rendit alfabetik):

1. Aleanca LGBT
2. Birn Shqipëri
3. Civil Rights Defenders (CRD)
4. Fondacioni Shoqëria e Hapur për Shqipërinë (OSFA)
5. Fondacioni Shqiptar për të Drejtat e Personave me Aftësi të Kufizuar (ADRF)
6. Gratë në Shërbim Publik (ËPS)
7. Instituti për Demokraci dhe Ndërmjetësim (IDM)

8. Instituti i Studimeve Politike (ISP)
9. Instituti i Studimeve Publike dhe Ligjore (ISPL)
10. Instituti Shqiptar i Shkencës (AIS)
11. Këshilli Shqiptar i Medias
12. Komiteti Shqiptar i Helsinkit (KShH)
13. Lëvizja Rinore Egjyptiane & Rome (LRER)
14. Lëvizja për Zhvillimin e Turizmi, Ksamil
15. Në dobi të gruas shqiptare
16. Nisma e Luleve
17. Partnerët Shqipëri për Ndryshim dhe Zhvillim
18. Pro LGBT
19. Qendra “Aleanca Gjinore për Zhvillim” (GADC)
20. Qendra ALTRI
21. Qendra Europiane
22. Qendra për Mbrojtjen e të Drejtave të Fëmijëve në Shqipëri (CRCA/ECPAT Shqipëri)
23. Qendra për Studimin e Demokracisë dhe Qeverisjes (CSDG)
24. Qendra për Nisma Ligjore Qytetare (QNLQ)
25. Qendra Shqiptare për Kërkime Ekonomike (ACER)
26. Qendra TREJA
27. Rrjeti i Fuqizimit të Gruas në Shqipëri (AËEN)
28. Rrjeti i Profesionistëve të Rinj
29. Shërbimi Ligjor Falas Tiranë (TLAS)
30. Shoqata Together for Life



9 Comments

  1. kur beri saliu nje falimentim te ngjashem qeveria ra per disa muaj. Por shqiptaret jan ne shumic komunista ne mentalitet dhe kur ta fut partia e enverit sikur nuk e ndjen dhe aq urine se ta fut omel e omel

  2. Denimi per thyerjen e karantines duhet te jete deri ne denim me vdekje, deri ne 15 vjet duhet te jete denimi per ata qe flasin per thyerje te karantines. Shperdorimi i detyres ose gjera te tilla te lehta si vjedhja me tendera apo pervetesimi i parave publike, duhet te kalohen me keshilla dhe me kthimin e nje pjese te lekeve ne llogarine e shefit per te bere bamiresi.

      1. E ke gabim Berat sepse Ulsiu ka thene edhe: Sic thote populli, shume mami e nxjerrin femijen cyryk. Pra ka dy shprehje per te cilat eshte bere doktor i shkencave juridike

  3. Bravo i qofte KM, qe po e mbron popullin shqiptar se mos te ishte ky ne krye te puneve vajhalli

    sa keq do kishin shkuar gjerat. vete Zoti na e solli qe ta kemi ne keto dite te veshtira . Ky

    njeri qe ka lindur per pune te medha po i duhet te shpenzoi kohen e tij te cmueshme edhe

    me opoziten gojeprishur apo me 30 apo 300 organizata qe nuk e din kurkush me cfare

    merren. Jo 15 vite, por 50 viTe e kane hak ata qe shkelin rregullat e vendosura nga

    Qeveria .Kjo eshte lufte dhe lufta ka rregulla te ashpra.

  4. Qe ne kemi nje person-qeveri me nje kryemister te paafte, te kriminalizuar te korruptuar e me tipare dikatori kjo ka kohe qe eshte qartesuar. Por politikanet jane pjelle e shumices. Nese shumica mendon qe eshte e pranueshme te lejohet nje individ te mare masa ekstreme duke cenuar te drejtat baze te njeriut qe ne hapat e pare te epidemise, atehere e meritojne situaten e katandisur te vendit. Mjere pjesa tjeter qe eshte me e kthjellet edhe mendon ndryshe…

  5. Pse jo, une jam edhe per futjen ne fuqi te ligjit kunder agjitacionit & propagandes si dhe hapjes se kampeve te internimit per ata hedhin dyshime per fjalet e liderit pervers.

  6. Me ben pershtypje organizata nr 1 ne renditje qe paska dale kunder se KM dhe Veliajn i kane anetare te hershem

Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *