Shtetet e Bashkuara thyen një tjetër rekord shqetësues të martën, kur regjistruan 47 mijë raste të reja me koronavirus, numri më i lartë i infeksioneve të reja brenda një dite që nga fillimi i pandemisë.
Infeksionet e reja shfaqen kryesisht në shtetet jugperëndimore, Arizonë dhe Teksas si dhe në Kaliforni. Po ashtu ka pasur rritje të infeksioneve edhe në Florida, Xhorxhia dhe Karolinën e Jugut.
Përhapja e infeksioneve në SHBA u shoqërua me paralajmërime nga eksperti kryesor amerikan për sëmundjet infektive, Dr. Anthony Fauci, i cili tha në një seancë informimi në Senat se ritmet e përhapjes së infeksionit mund të arrijnë në 100 mijë raste të reja në ditë nëse nuk merren masa.
“Pa diskutim, për momentin nuk e kemi problemin nën kontroll,” tha Dr. Fauci. Ai paralajmëroi se reagimi me masa të përqëndruara vetëm tek shtetet që aktualisht po regjistrojnë keqësim të problemit, “e vë të tërë vendin në rrezik”.
Më shumë se 127,000 amerikanë kanë vdekur nga COVID-19, mbi 2 milionë e 636 mijë kanë rezultuar pozitivë dhe miliona kanë humbur punën. Ekonomia u tkurr mjaft në tremujorin e parë dhe pritet të shënojnë rënie edhe më të thellë për tremujorin prill-qershor.
Dr. Fauci po dëshmonte në Kongres, ndërkohë që guvernatorët e Nju Jorkut, Nju Xhërsit dhe Konektikatit, tre shtete në pjesën verilindore të vendit që u përballën me pandeminë në fillimet e përhapjes në SHBA, shtuan shtetet e Kalifornisë, Xhorxhias, Ajdahos, Ajovas, Luizianës, Misisipit, Nevadës dhe Tenesisë në listën e shteteve, banorët e të cilëve do të kërkohen të qëndrojnë në karantinë për dy javë.
Lista përfshinte fillimisht tetë shtete – Alabamën, Arizonën, Arkansasin, Floridën, Karolinën e Veriut, Karolinën e Jugut, Teksasin dhe Jutan në karantinën e vendosur nga Nju Jorku, Nju Xhërsi dhe Konektikati.
Shtimi i rasteve me koronavirus ka detyruar guvernatorët e Floridës, Teksasit dhe Kalifornisë të ngadalësojnë planet e rihapjes, duke u dhënë urdhër bareve dhe restoranteve të mbyllen dhe duke bërë të detyrueshme vënien e maskave.
SHBA kryesojnë në botë me numrin më të lartë të infeksioneve. Si rezultat amerikanët nuk janë përfshirë në listën e vendeve që do të lejohen të vizitojnë Bashkimin Evropian.
Bashkimi Evropian heq disa kufizime
BE hoqi të martën kufizime udhëtimi për vizitorë nga Algjeria, Australia, Kanadaja, Gjeorgjia, Japonia, Mali i Zi, Maroku, Zelanda e Re, Ruanda, Serbia, Koreja e Jugut, Tajlanda, Tunizia dhe Uruguaj.
Por udhëtarët nga vende ku ka pasur përhapje të epidemisë, përfshirë Shtetet e Bashkuara, Brazilin dhe Indinë, nuk lejohen në këto momente.
Vizitorë nga Kina do të lejohen të futen në vende të BE-së me kusht që Kina të heqë kufizimet ndaj evropianëve.
Pritet që lista të ndryshojë çdo dy javë me emra që shtohen, apo përjashtohen në varësi të ritmeve të përhapjes së koronavirusit, por nuk parashikohet që kufizimet e vëna nga BE ndaj Shteteve të Bashkuara të hiqen së shpejti.
Kriteret e deklaruara nga Bashkimi Evropian diktojnë që numri i rasteve të reja me koronavirus në një shtet të caktuar të jetë i krahasueshëm ose nën mesataren që po regjistron BE-ja dhe se shifrat e përgjithshme po stabilizohen ose po bien në mënyrë që të lejohen vizitorë.
Në shkallë botërore, afro 10.5 milionë vetë kanë rezultuar pozitivë me koronavirus që kur virusi u diktua për herë të parë në Kinë vitin e kaluar dhe filloi të përhapej në të gjithë botën. Aktualisht në shkallë globale numërohen mbi 512 mijë të vdekur nga COVID-19. /VOA
Mendoj se shpërthimi i madh i numurave rekorde të të infektuar nga Kovid 19 në SHBA, lidhet me dy arsye krysore.
E para se në këtë shtet në tërësi ka një numur rekord të testimeve që nuk e kanë shtetet e tjera, rreth 35 milionë testime. Testime të shumta ka edhe Rusia, por atje ndryshe nga SHBA ku krahët politikë synojnë ti shtojnë shifrat e njeri tjetrit , Putini si Rama në Shqipëri , kërkon ti zvogëlojë ato, veçanërisht shifrat e viktimave.
Ndërkaq a mund të besohet ae në shtetin diktatorial të Koresë së Veriut, nuk ka pasur asnjë të infektuar apo viktimë nga kjo pandemi apo Kina, vëndlindja e virusit me një popullsi mbi 1 miliard e 400 milion banorë, ka numurat më të ulta për një milion banorë të të infektuarve e të viktimave ?
Po përmend edhe një paradoks të një shteti afrikan, Sudanit me 43 milionë banorë, ku ndonëse janë publikuar vetëm rreth 300 testime gjithsej, numuri i viktimave është më i madh se kjo shifër, e të “infektuar” na dalin mbi 2000 persona.
Së dyti, ndryshe nga Europa e kontinente të tjera, ku ka shtete nacionale me politika ndarëse të bllokimit të kufijve, midis 50 shteteve që përbëjnë këtë shtet të madh kontinental, nuk u zbatua bllokimi i lëvizjes midis shteteve.
Një arsye e tretë që nuk duhet nënvlerësuar, është edhe ndezja e motorëve të fushatës elektorale presidenciale, që është shoqëruar me grumbullime të mëdha të tifozërisë politike e që kulmoi me protestat masive, dukshëm me tendencë politike, për vrasjen e një afroamerikani nga një polic i bardhë
Ne amerike rreth 60 % e testeve kane dale gabim pasi metoda e testimit vetem me saliva nuk eshte e sakte dhe KJO ESHTE PRANUAR DHE NGA KOMPANIA QE PRODHONTE KITET E TESTEVE