Fiton duartrokitje, i lë të gjithë gojë-hapur e i bën tifozët të ëndërrojnë. Erling Haaland e ka mbyllur sezonin e fundit (luajtur përgjysëm me Salzburg e Borussia Dortmund) me 44 gola të shënuar. Numra impresionues për një djalosh (194 centimetra) që në qershor mbushi 20 vjec. Ai në një mënyrë apo tjetër qëllimin e vetëm ka të zbavisë publikun. E nëse nuk do të ishte bërë futbollist?: “Nëse nuk do tia kisha dalë në sport, do të isha bërë rapper – ka shpjeguar ai për Soccerbible -. Duhet të jem i sinqertë: shpresoj, një ditë, të kem një këngë hit në Norvegji”.
Tek Borussia norvegjezi duket i lumtur, madje është i bindur se bëri zgjedhjen e duhur, duke anashkaluar interesin edhe të klubeve më të rëndësishme. “Besoj se unë e im atë, përvec shumë personash të tjerë rreth meje, punuam mirë në zgjedhjen e klubit të ri – shpjegoi Haaland -. U ndjeva në vendin e duhur që në sekondën e parë. Për këtë nga dita në ditë ishte më e lehtë të jepja rendiment, të stërvitesha e të isha menjëherë vetvetja. Për mua kjo është e rëndësishme”.
Ajo që e ka impresionuar që në fillim ishte ‘muri i verdhë’ legjendar i tifozëve të Dortmund. “Herën e parë që e pashë murin e verdhë ishte gjatë nxemjes. Më kujtohet se mu duk jashtëzakonisht i madh. Atmosferë e pabesueshme”. Ambjenti ideal për të rrëmbyer duartrokitje, ti lërë të gjithë pa mend. Për momentin me gola. Një ditë, kushedi, me një këngë rap.