Gjykata Federale Penale e Bellinzona ka kërkuar një dënim me 28 muaj burg për presidentin e Paris Saint Germain, Nasser Al-Khelaifi, si pjesë e hetimit në caktimin e të drejtave televizive të Kupës së Botës dhe Kupës së Konfederatave nga FIFA dhe beIN Sports, një rrjet global në pronësi të vetë Al-Khelaifit. Së bashku me numrin një të parisianëve, po hetohet edhe ish-sekretari i përgjithshëm i FIFA-s, Jerome Valcke, për të cilin drejtësia zvicerane ka kërkuar 3 vjet burg.
Valcke akuzohet për krimin e korrupsionit pasiv, administrim të pandershëm dhe falsifikim të dokumenteve, ndërsa për sa i përket biznesmenit katariot akuza është ajo e nxitjes së administrimit të pandershëm. Së bashku me ta është edhe një i akuzuar i tretë, biznesmeni me origjinë greke Dinos Deris, i akuzuar gjithashtu për nxitje të administrimit të pandershëm dhe korrupsion. Për të u kërkuan gjithashtu tre vjet burg.
Sipas rindërtimit të fakteve nga hetuesit, Valcke ka marrë avantazhe të padrejta nga të dy të bashkëpandehurit e tjerë: pagesa për një vlerë totale prej 1.25 milion euro nga Deris dhe të drejtat e gëzimit falas të një vile luksoze në Sardenjë nga Al-Khelaifi. Në këmbim, ish-sekretari i përgjithshëm i FIFA-s ka ushtruar ndikimin e tij për të drejtuar ku duhet caktimin e të drejtave televizive të edicioneve të ndryshme të Kupës së Botës dhe Kupës së Konfederatave të planifikuara midis 2018 dhe 2030.