Dy shkencëtarë amerikanë dhe një britanik, Harvey J Alter, Michael Houghton dhe Charles M Rice janë shpallur fitues të Çmimit Nobel për Mjekësi në vitin 2020. Shkencëtarët u vlerësuan për punën e tyre në identifikimin e virusit të Hepatitit C, i cili shkakton cirrozë dhe kancer të mëlçisë.
Asambleja e Nobel në një deklaratë ka thënë se shkencëtarët do të fitojnë çmimin prej 10 milion kuronash Suedeze (1,1 milion dollarë). Zbulimi i virusit që shkakton Hepatitin C bëri që të arrihet kuptimi më i thellë për hepatitin kronik, duke krijuar ilaçe të reja dhe të shpëtojnë mijëra jetë. Çmimi vjen në një kohë tejet kritike dhe të rëndësishme për mjekët, duke pasur parasysh vëmendjen shtesë të sjellë nga koronavirusi.