Francesco Totti e ka shprehur gjithë dhimbjen e tij për humbjen e të atit, “Sherifit”, udhërrëfyesi i jetës e karrierës së kapitenit legjendar të Romës. Pas funeralit të kryer sot, Totti ka kujtuar të atin me një postim të gjatë e prekës në Instagram: “Lamtumirë babà, kam kaluar 10 ditët më të këqija të jetës sime, duke ditur se ishe “vetëm” duke luftuar kundër të keqes e nuk mund të të shihja, flisja, përqafoja, shtrëngoja, do kisha bërë gjithcka të të qendroja pranë”.
Totti ka dashur të kujtojë, duke i dhënë meritat për vlerat e përcuara: “Tani jeta ime është ndryshe, sepse jam rritur me vlera të rëndësishme e për këtë dua të të falenderoj baba, për gjithë atë që ke bërë për mua, që më bëre një njeri të fortë e kurajoz, do të të dua gjithnjë babai im!!”. E ish-kapiteni verdhekuq nuk e fsheh dhimbjen e as pishmanet: “Do të doja ende të dëgjoja zërin tënd, më mungojnë të qeshurat që bënim, më mungon buzëqeshja jote, sytë e tu, më mungon të të shoh në divan duke parë tv. Duhet të të them më fal e faleminderit… Më fal për cdo herë që nuk kuptova, për të gjitha herët që nuk të thashë të dua, më fal për gjithë përqafimet e munguara, për fjalët e pathëna, për gabimet që kam bërë, por mbi të gjitha faleminderit që ke qenë një baba e nuk do reshtësh kurrë së qeni”.
“Pa ty nuk do ia kisha dalë kurrë, edhe pse nuk je më me ne, kujtimi yt e buzëqeshja jote nuk do harrohen kurrë! Kishe shumë miq që të donin, sepse ti kishe dicka ndryshe, ishe gjithnjë prezent, gjithnjë i disponueshëm, ishe miku i të gjithëve, ishe e je krenaria ime (shpresoj të kem qenë edhe unë për ty). Sot më shumë se kurrë kam kuptuar sa i rëndësishëm ke qenë në jetën time, e në vitet e ardhshme do ti mbaj këto kujtime të cmuara në zemrën time. Lamtumirë babà… madje… lamtumirë sherif….. udhëtim të mbarë. Francesco yt”.