Shpresonte të niste sezonin e Champions me një fitore të lehtë. Përkundrazi, Zinedine Zidane, përgjegjës kryesor për zgjedhjet e gabuara në formacionin titullar (mban në pankinë për gjithë pjesën e parë Kroos, Benzema e Vinicius), pëson një humbje të rëndë 2-3 në shtëpi kundër Shakhtar Donetsk.
Vendosën takimin golat e Teté, Solomon e autogoli i Varane, të gjithë në pjesën e parë. Zhëgnjyes totalisht Jovic, Rodry e Varane, që fundosën teknikun francez. Në të 29 Tete tronditi merengues, 4 minuta më vonë qendërmbrojtësi francez e dërgoi topin në rrjetën e tij, ndërsa për të mbyllur turpërimin e 45 minutave të para Solomon shënoi të tretin, tre minuta para se skuadrat të zbrisnin në dhomat e zhveshjes.
Në pjesën e dytë Zidane e kuptoi gafën e kushtueshme dhe rifilloi lojën me Benzema. Vetëm prezenca e numrit 9 i dha tjetër ritëm Blancos që ngushtoi diferencën me Modric në të 54, moment kur futet në fushë edhe Vinicius. Braziliani tregoi pas vetëm 5 minutash sa gabim ishte mbajtja e tij në pankinë me golin e dytë për Real. Por nuk mjaftoi. E përfundon me befasinë në fund ku 3-3 në kohën shtesë, shënuar nga Valverde, anullohet për pozicion jashtë loje. Një rrëshkitje e rrezikshme kundër asaj që mund të ishte skuadra më e dobët e grupit, që e bën Inter të buzëqeshë.
Në ndeshjen tjetër të pasdites së vonë, Salzburg e Lokomotiv Moskë barazuan 2-2 falë golave të Szoboszlai e Junuzovic për vendasit e Eder e Lisakovich për rusët. E nisën fort miqtë që, pas një serie aksionesh të rrezikshme, gjejnë avantazhin në të 19′ falë goditjes me kokë të Eder. Në fund të pjesës së parë, në të 45′, erdhi barazimi i firmosur nga Szoboszlai me një të djathtë të fortë nga jashtë zonës. Në pjesën e dytë, është Salzburg që kishte një marsh më shumë dhe gjeti golin e përmbysjes 2-1 në të 50′ me një tjetër goditje nga distanca, këtë herë të Junuzovic, por në të 75′ mbërriti edhe barazimi final 2-2 i Lokomotiv, me goditjen me kokë të Lisakovich.