Edy Reja mendonte të kishte në dispozicion të paktën për dy ndeshjet e Nations League kundër Kazakistanit e Bjellorusisë edhe Marash Kumbullën, për të cilin FSHF dhe vetë tekniku ishin në negociata, duke ofruar madje edhe avion privat për ta marrë, por shpresat janë shuar nga përgjigjet e tamponeve të kryera të hënën nga Roma, pas shpërthimit të koronavirus në Trigoria: edhe Kumbulla ka rezultuar pozitiv.
Kështi, rriten rastet e koronavirus në shtëpinë e Romës: pas pozitivitetit të Dzeko e të portierit të të rinjve Boer, në fakt, janë zbuluar edhe ato të Federico Fazio, Davide Santon e Lorenzo Pellegrini. I fundit në radhë është pikërisht qendërmbrojtësi i kombëtares Kumbulla, që ka mësuar sot se është infektuar me Covid. Janë gjashtë pozitivët aktualë, duke e hapur dyshimin tani se në Trigoria është një vatër e vërtetë.
“Përshëndetje të gjithëve! Nga tamponi i bërë kam rezultuar pozitiv me Covid-19, por për fat jam mirë e nuk kam simptoma – ka thënë Kumbulla në rrjetet sociale -. Askush nuk mund ta quajë veten të mbrojtur nga ky virus, do të doja të sensibilizoja të gjithë ju të evitoni sjellje që mund të vënë në rrezik shëndetin tuaj e të të tjerëve. Një përshëndetje të gjithë tifozëve e një mendim afektiv për të gjithë personat që po kalojnë një moment të vështirë. Do të shihemi së shpejti në fushë!”.