Italia është tronditur nga një krim i rëndë pas zbulimit të 3 valixheve të mbushura me mbetje njerëzore në një zonë pranë autostradës Firence – Pisa – Livorno. Autoritetet kanë konfirmuar se eshtrat i përkasin një burri dhe një gruaje.
Trupat janë copëtuar me sharrë pas vrasjes dhe janë futur në valixhe. Identifikimi është i vështirë për shkak se trupat e janë dekompozuar rëndë dhe dyshohet se ngjarja ka ndodhur të paktën mbi 1 vit më parë. Dyshohet se eshtrat i përkasin një çifti shqiptar, pasi në krahun e burrit është dalluar një tatuazh.
Dyshimet janë se mund të bëhet fjalë për Shpëtim dhe Teuta Pasho, 54 dhe 52 vjeç. Ata u shpallën të zhdukur nga vajza e tyre Dorina në nëntor të 2015-ës. Ata jetonin herë në vendlindje dhe herë në Toskana, por humbën gjurmët papritur.
Trupat u gjetën jo shumë larg banesës së tyre. karabinierët besojnë se kemi të bëjmë me një vrasje brutale. Çifti i shqiptarëve ka edhe një djalë në burg të dënuar për trafik droge.
“Unë u kontaktova nga karabinierët, por duhet të presim hetimet” – thotë Dorina. “Një tatuazh? Po, mbase babai im e kishte një, me vitin në të cilin ishte në ushtri”.
Kërkimet në zonë vazhdojnë pasi dyshohet se mund të ketë edhe një valixhe të katërt me mbetje njerëzore. Kërkimet janë bërë të vështira për shkak të zonës të mbushur me ferra dhe shkurre. Autopsia e kryer këtë pasdite tregon se gruaja ishte rrahur brutalisht.
Ajo duhet të ketë marrë shumë goditje në fytyrë dhe kokë pasi ka thyerje e kockës hyoidale dhe të disa brinjëve. Ndërsa autopsia e kryer ndaj burrit tregoi se ai është vrarë me një goditje me thike në fyt. ©LAPSI.al