Stuhi polemikash në Angli pasi tre lojtarë të Tottenhamit (Reguilon, Lo Celso dhe Lamela) dhe një i West Ham (Lanzini) u mblodhën së bashku me familjet e tyre për të festuar Krishtlindjen, duke shkelur bllokimin të cilit i nënshtrohet qyteti i Londrës. Një foto e lojtarëve të buzëqeshur (18 vetë gjithsej) ndezi zemërim në rrjetet sociale. Të dy klubet kërkuan menjëherë falje dhe policia lokale ka hapur një hetim.
Kufizimet e vendosura në zonën e Londrës i ndalojnë njerëzit të shkojnë në shtëpitë e të tjerëve, përveç në raste të veçanta. “Ne jemi jashtëzakonisht të zhgënjyer dhe dënojmë me forcë këtë imazh që tregon disa nga lojtarët tanë me familjen dhe miqtë e tyre së bashku në Krishtlindje, veçanërisht pasi i dimë sakrificat që të gjithë kanë bërë, në të gjithë vendin, për të qëndruar të sigurt gjatë periudhës së pushimeve.” shkruan komunikata e Tottenham.
Në kampin e Spurs, José Mourinho nuk e ka fshehur zhgënjimin e tij dhe tregon se ai i kishte dhuruar Regulion një gic portugez për ta bërë atë të ndjehej më pak i vetëm gjatë pushimeve. “Një dhuratë fantastike. Një dhuratë fantastike. Një gic portugez, që është fantastik për një portugez e një spanjoll – tha Special One pas fitores kundër Leeds – Kështu që unë ia dhashë atij sepse më thanë se do ti kalonte Krishtlindjet vetëm. E mendova për të. Por nuk ishte vetëm, siç mund ta shihni. E si klub padyshim që ndihemi të zhgënjyer sepse u japim lojtarëve të gjithë edukimin, u japim lojtarëve të gjitha rekomandimet dhe natyrisht nuk jemi të lumtur. Ishte një surprizë negative për ne ”
Në mbrëmje erdhi edhe ndjesa nga Lamela dhe Lanzini, por të gjithë lojtarët përballen tashmë me një dënim të rëndë.