E ardhmja e Gigio Donnarumma në Milano është ende për tu shkruar. Kontrata e portierit të lindur në 1999 me klubin kuqezi skadon më 30 qershor 2021 dhe për momentin nuk ka asnjë lajm për rinovimin. Në Francë, ndërkohë, thashethemet se portieri i ri është ndër objektivat kryesorë të PSG po intensifikohen: Leonardo, i cili e njeh atë mirë, po punon për ta sjellë në Paris. Donnarumma konsiderohet njeriu i duhur për të marrë trashëgiminë e 34-vjeçarit Keylor Navas.
Sipas asaj që raportohet nga portali francez ‘Le10sport’, në lidhje me merkaton, priten të jenë muaj të nxehtë për Donnarumman. Arsyeja e parë e vlefshme për të shtyrë PSG të vërë bast mbi titullarin kuqezi është përvoja e nivelit të lartë të portierit, pavarësisht moshës 21 vjeç (22 që do të bëhet më 25 shkurt). Për më tepër, një transferim i mundshëm do të lejojë parisianët të konsolidojnë më tej lidhjet e tyre me Mino Raiolan, menaxher i shumë emrave të mëdhenj në futbollin evropian. Në fund, duke pasur parasysh 34 vitet e Navas, me ardhjen e Donnarumma klubi francez do të kishte siguruar të ardhmen mes shtyllave.