Dy tituj u zhdukën në 6 ditë. Kjo mund të jetë përmbledhja e javës së fundit tronditëse të Real Madrid. Në fillim disfata në SuperKupë kundër Athletic Bilbao, pastaj lamtumira ndaj një titulli potencial siç është Kupa e Mbretit, nga një ekip i divizionit të tretë: Alcoyano. Një figurë e keqe galaktike (aspak i denjë për emrin e Blancos) që mund t’i kushtojë pankinën Zinedine Zidane. Trajneri francez, në fund të ndeshjes, u përpoq të minimizonte duke shpjeguar konceptin si normal në futboll: “E vërteta është që ne u përpoqëm. Lojtarët dhanë gjithçka, ne patëm mundësinë të shënonim golin e dytë dhe kur atëherë kur nuk ja del, ndodh ajo që na ndodhi ne. Është një moment i vështirë, jemi jashtë kupës. Unë jam trajneri, përgjegjësia është e imja dhe e marr përsipër si gjithmonë. Lojtarët janë përpjekur: nëse do të kishim shënuar të dytin do të kishim parë një ndeshje tjetër. Ky është futbolli. Nuk është turp, këto gjëra ndodhin “.
‘Marca’ nuk i bie shumë anash: cikli i Zidane në Madrid “ka mbaruar”. Për të përditshmen ‘Sport’, ishte “një eliminim që e vendos francezin më shumë jashtë sesa brenda klubit”. Për momentin shoqëria nuk duket e gatshme të ndryshojë pankinën, edhe pse, kujton gazeta, shkarkimi i trajnerit, i lidhur me Realin deri në qershor 2022, do t’i kushtonte arkave të klubit 40 milionë euro në sezon. Klubi, shkruan ‘Marca’ përsëri, nuk synon të marrë vendime drastike menjëherë, duke preferuar të presë deri në fund të sezonit për të nisur një Real të ri pa disa nga protagonistët aktualë. “Dhe vetë francezi, nga ana tjetër,” nuk ka ndërmend të japë dorëheqjen “.
Padyshim që fati i Zizou është i lidhur me rezultatet e ardhshme të madrilenëve, aktualisht në Liga në -4 nga Atletico Madrid (që, ndërkohë, ka dy ndeshje më pak) dhe kundërshtarë të ardhshëm të Atalantës në fazën me eleminim të Champions League. Nga Argjentina, megjithatë, sigurojnë se Florentino Perez po mendon të zëvendësojë francezin: sipas Espn zgjedhja mund të bjerë te Marcelo Gallardo, trajneri aktual i River Plate.