Një vrasje ka ndodhur sot në Prishtinë. Skender Krasniqi dyshohet se ka vrarë djalin e tij, biznesmenin Albert Krasniqi. Ngjarja ka ndodhur rreth orës 17:00 ndërsa babai i viktimës është arrestuar dhe është konfiskuar arma me të cilën dyshohet se është kryer vrasja.
“Ejani se e vrava djalin”, ka telefonuar babai i Albert Krasniqit në polici. Gazeta Express shkruan se dyshohet se viktima ka pasur probleme familjare dhe ka kërcënuar familjarët e tij.
Albert Krasniqi ishte i martuar me ish-miss Kosovën Besa Gashi, ndërsa së fundmi ata i dhanë fund martesës së tyre, pasi kishin pasur kriza edhe në të kaluarën.
Nga martesa e tyre ata kanë edhe një vajzë. Vetëm 7 orë më parë viktima e kishte postuar një fotografi të vajzës së tij, me mbishkrimin “dashuria e babit”.
Krasniqi ishte i përfshirë edhe në plagosjen e reperit Noizy në qendër të Prishtinës më 13 shtator të vitit 2016. Noizy u dënua me 2 mijë euro gjobë për incidentin ku ai mbeti i plagosur.
Ndërsa, Albert Krasniqi ishte dënuar nga Gjykata me 6 muaj burgim me mundësinë që dënimin ta shlyejë me para. Vendimi i gjykatës e ngarkonte Krasniqin edhe me një dënim shtesë prej 8 mijë eurosh. ©LAPSI.al