Mjafton edhe një gol, sepse ishte e nevojshme fitorja. Për moralin, për impaktin e trajnerit të ri e për renditjen. Orges Shehi ka debutuar me fitore në stolin e Tiranës, me bardheblutë që kanë triumfuar minimalisht 0-1 ndaj Apolonisë në Loni Papuciu. Vendosi ndeshjen Taulant Seferi, në golin e parë me fanellën bardheblu në minutën e 76’, që I dha tre pikë të tijve.
Dëshira për të bërë kthesën ndihej që në minutat e para tek bardheblutë që në cerekorëshin e parë e mbështetën Apoloninë tek litarët, por nëse rezultati nuk ndryshoi ishte vetëm për mungesë fati. Dy herë kryeqytetasit goditën shtyllën: me Bathën në minutën e 10-të dhe më pas me Muçin në minutën e 14-të.
Camarata nuk arriti të bënte surprizën, si kishte bërë në javët e fundit. Apolonia e tij në pjesën e parë ishte e plotësisht e kujdesur për të mos pësuar, duke i lënë shumë inisiativë miqve, që në minutën e 76’ e zgjidhën me golin e Seferit. Më këtë fitore bardheblutë shkojnë në kuotën e 23 pikëve dhe renditen në vendin e 6-të, ndërsa Apolonia qëndron në vendin e 8-të me 13 pikë.