Milutin Kërçiç kishte mbetur në zemrat dhe mendjen e të gjithë tifozëve korçarë, sidomos të atyre të viteve 70’-80’, ku ishte një prej më të dalluarve të brezit të artë të asaj kohe. Me talentin që shfaqte në fushë, ai bëri që shumë sportdashës të dashuroheshin me lojën që bënte e për këtë arsye dhimbja për ndarjen e tij nga jeta në moshën 63 vjecare është e madhe. Prej kohësh ai vuante nga një sëmundje e rëndë, e cila mbrëmjen e së shtunës, i ka marrë jetën.
Në sezonin 2010-2011, Kërçiçi ishte edhe pjesë e stafit teknik të Skënderbeut, si dhe ndihmësi i parë i ish-trajnerit Shpëtim Duro. Edhe me ardhjen e teknikut çek Stanislav Levi, ai vazhdoi punën pranë skuadrës si ndihmës trajner, por edhe si përkthyes për lojtarët sllavë që luajnë te kjo skuadër, duke patur një meritë të madhe në ndërtimin e Skënderbeut të madh.
Për ndarjen nga jeta të Kërçiç ka reaguar edhe presidenti i Federatës Shqiptare të Futbollit Armand Duka, që ka shprehur ngushëllimet për familjen dhe miqtë e ish-futbollistit e, më pas, trajnerit të Skënderbeut.
MESAZHI I NGUSHËLLIMIT I DUKËS
Kjo e dielë nisi me një lajm të trishtë për futbollin shqiptar dhe për komunitetin sportdashës korçar.
Milutin Kërçiç, ish-futbollisti i Skënderbeut dhe ekipit kombëtar Shpresa u nda nga jeta pas një beteje me një sëmundje të rëndë.
Kërçiç është një nga futbollistët më të mirë në gjithë historinë e klubit korçar, ku luajti në vitet ’70-’80 dhe kontribuoi më pas me përvojën e tij të vyer për disa sezone si pjesë e stafit teknik.
Me talentin e tij ai rrëmbeu zemrat e tifozëve korçarë, duke mbetur një nga futbollistët më të dashur për këtë komunitet.
I shpreh ngushëllimet më të sinqerta familjes, të afërmve dhe miqve të tij.
I paharruar qoftë kujtimi i Milutin Kërçiç!