“Tek rasti i golit, nuk e di si është rregullorja, momenti i golit, Aleksi përplaset me arbitrin, topi është në mesfushë dhe arbitri duhet të ndalte lojën minimalisht”. Edi Martini nuk e fsheh nervozizmin për pikët e lëna që i kushtuan vendin e parë Teutës. Fitorja do ta kishte bërë që në pritje të Vllaznisë të shihte klasifikimin nga vendi i parë, por gjërat shkuan ndryshe dhe e gjithë mëria e teknikut bie mbi Bastarin.
Arbitri në fakt bllokoi Aleksin që ndiqte topin, por vazhdoi lojën dhe Antoni Beji barazoi në minutën e 37: “Nuk është ndonjë gjë e madhe barazimi sepse nje pike jemi diferencë, por edhe ne duhet të fitonim, edhe Laçi erdhi fitoi në Ballsh edhe Partizani, neve na nervozoi që lamë pikë këtu – insistoi shkodrani i Teutës -. Plaku nuk ka kondicionin e duhur por luajti mirë aq sa luajti, ne duhet ta zgjidhim më shpejt ndeshjen. Është një rast që duhet parë sepse me rregulloren e re loja duhet të ishte ndalur”.
Një rezultat që mund të ketë pasoja më pas dhe Martini e ka të qartë: “Normalisht i qaj këto dy pike te lëna sepse mund të ishim në vendin e parë, por fusha e Ballshit është shume e vështirë, të katërt skuadrat janë pretendent për titull kampion. Më vjen keq sepse krijuam raste humbëm shumë raste, jemi ekip që krijojmë shumë dhe kjo më vjen keq”.