Një kamion me 220 kilogramë kanabis u kap nga policia në Podgoricë.
Dyshohet se droga vinte nga Shqipëria.
Autoritetet malazeze kanë sinjalizuar policinë shqiptare, ndërsa deri më tani ka rezultuar se shoferi i kamionit nuk është shqiptar dhe kompania që merret me import-eksport, është me qendër në Podgoricë.
Sipas të dhënave të mbërritura nga Mali i Zi, kamioni në të cilën ishte droga ishte i mbushur me fruta-perime, e konkretisht lakra.
Autoritetet shqiptare do verifikojnë edhe të dhëna tjera për itinerarin e kamionit, megjithëse deri më tani për arsye hetimore nuk bëhen të ditura.
Kujtojmë se kjo është ngarkesa e dytë brenda pak muajsh që kapet në Malin e Zi, ndërsa metoda e përdorur është e njëjta, me anë të kamionëve të deklaruar për import-eksport fruta perimesh.
Dyshimet e para janë se mund të kemi të bëjmë me të njëjtën linjë, por grupi hetimor ende nuk ka një rezultat pasi është ende herët.