Një derbi i humbur nuk është një ndeshje e zakonshme e Tirana e Partizani e dinë mirë, ashtu si edhe tifozët. E megjithatë kush priste ndonjë reagim të qartë nga Refik Halili ka mbetur i zhgënjyer. Numri 1 i klubit bardheblu ka folur për mediat, pas humbjes, por duke komentuar mbi një objektiv që duket i kompromentuar rëndë: “Unë do t’i shmangem pyetjes për titullin – tha Halili me folizofi -. Unë them që kampionati është i gjatë dhe vazhdon. Nuk po diskutoj çfarë mendoj unë më gjatë se kaq. Jam i shqetësuar që ne e humbëm këtë ndeshje. Skuadra sot pak a shumë ishte e plotë. Megjithëse, Batha, Kale, Torasa kanë pasur dëmtime dhe kanë bërë një stërvitje jo të plotë. Jam i kënaqur që janë kthyer të gjithë lojtarët. Shpresoj që të vazhdojmë. Për titullin do të flasim mbas përfundimit të kësaj faze”.
Një pickim për teknikun Shehi, që sipas presidentit e kishte skuadrën e plotë në këtë humbje e që presidenti mundohet ta zbusë më pas: “Ne kishim bërë 3 fitore para derbit. Skuadra është e mbledhur. Në ditët në vazhdim do të jemi më mirë. Ka pasur edhe disa diskutime, shpresoj që skuadra të eci para”, përfundoi Halili.