Gjykata e Apelit në Shkodër ka rikthyer për gjykim në Shkallën e Parë çështjen e tjetërsimit të pronave në zonës e Ranës së Hedhun në Shëngjin, për të cilën mes 17 personave të dënuar nga Gjykata e Lezhës është dhe ish-kryebashkiaku Fran Frrokaj.
Vendimi është marrë këtë të mërkurë dhe pritet që në ditët në vijim trupa gjykuese e kryesuar nga Vojsava Osmanaj të japë edhe vendimin e zbardhur.
Gjatë shpalljes së vendimit gjykata arsyetoi se gjykimi në shkallën e parë nuk është zhvilluar si një proces i rregullt ligjor, pasi ka pasur shkelje procedurale si mos veçimi i çështjes, i cili është bërë me arsyetimin e bashkëpunimit edhe pse në fund ka vendosur se s’ka bashkëpunim. Po ashtu thuhet se gjatë gjykimit në shkallen e parë nuk është pranuar një kërkesë për kryerjen e aktit te ekspertimit.
Gjykata e Shkallës së parë në Lezhë ne muajin shtator të vitit 2020 shpalli fajtor dhe dënoi me katër vite burg për “Shpërdorim detyre” ish-kryetarin e Bashkisë Lezhë Fran Frrokaj, për akuzën e tjetërsimit të pronave te Rana e Hedhun në bregdetin e Shëngjinit.
Gjithashtu për shpërdorim detyre u dënua ish-nënkryetari i bashkisë Enver Hafizi me 1 vit burg, ish-kryetari i Qarkut Gjok Ndoka me 4 vite burg dhe ish-drejtori i Hipotekës Artan Djala me 3 vite burg. Në total gjyqtari Ilir Perdeda dha 37.6 vite burg për 17 persona, nga 43.6 vite që kishte kërkuar prokurori Erjon Shehaj.
Hetimet për tjetërsimin e pronave në zonën e Ranës së Hedhun në Shëngjin kanë nisur në vitin 2017-të, kur në prokurori u denoncua tjetërsimi i 234 mijë e 548 metër katrore tokë shtetërore ranishte.
Fillimisht në këtë çështje sëbashku me kryebashkiakun u arrestuan edhe 22 persona të tjerë, por në gjykatë dosja u dërgua për 18 persona, nga të cilët vetëm një u shpall i pafajshëm. Ndërkohë Lekë Frroku (pa lidhje familjare me ish-kryebashkiakun), një prej të dënuarve në shkallen e parë si organizatorë i tjetërsimit të pronave në një reagim në rrjetin social Facebook e ka konsideruar dënimin e shkallës së parë si vendim politik.
“Vendimi i Gjykatës së Apelit Shkodër, tregoj qartë se çështja në Gjykatën e Lezhës ishte e paragjykuar. Ishte thjesht gjyq politik ndaj zyrtareve të PD dhe LSI. Një akuzë e kamufluar dhe një vendim i pa arsyetuar dhe pa mbështetur në prova ligjore”, shkroi Frroku./Birn/