Eurodeputetja dhe raportuesja për Shqipërinë në Parlamentin Europian, Isabel Santos, në një intervistë për “European Western Balkans” u shpreh se fakti që BE mbështet caktimin e Konferencës Ndërqeveritare me vendin tonë është një sinjal i mirë për qytetarët.
Santos thotë se “Besoj se fakti që në raport ne mbështesim caktimin e Konferencës së parë Ndërqeveritare është një sinjal shumë i mirë për qytetarët e Shqipërisë pasi ne besojmë se vendi është në rrugën e duhur në lidhje me procesin e anëtarësimit në BE. Siç e dimë të gjithë, shqiptarët janë një nga popujt më pro-europianë, prandaj ky është një përfundim shumë i rëndësishëm”.
Ajo theksoi edhe njëherë çështjet me rëndësi për Shqipërinë si forcimi i dialogut politik dhe institucioneve demokratike, nevoja për të përmirësuar pjesëmarrjen e shoqërisë civile, rëndësia e rritjes së niveleve të mediave dhe rritja e masave konkrete për të adresuar rënien demografike dhe largimin e trurit, ndër shumë të tjera.
Santos e konsideroi Raportin për Shqipërinë si pozitiv që tregon se Shqipëria ka bërë shumë përparim në fusha të ndryshme.
“Unë mendoj se zgjedhjet e ardhshme janë shumë të rëndësishme për Shqipërinë, dhe siç them në raportin tim ato do të jenë thelbësore për konsolidimin dhe ripërtëritjen e procedurave dhe strukturave demokratike të vendit dhe arritjen e një niveli më të lartë të stabilitetit politik”.
“Unë ndaj pikëpamjet e Komisionit që vlerësoi përparimin e bërë në reformën zgjedhore, në përputhje me mendimin e përbashkët të Komisionit të Venecias dhe OSBE / ODIHR, dhe gjithashtu shpresoj që ndryshimet e mbetura teknike të mund të zbatohen sa më shpejt të jetë e mundur”, shtoi ajo.