Vendi i parë, në shoqërinë e Vllaznisë, në përfundim të një ndeshje shumë delikate kundër Lacit. Mjaftoi një gol fantastik i Dejvi Bregut që Teuta t’i japë fund tre barazime radhazi, duke u rikthyer tek fitorja në javën e 26 të Superiores. Kurbinasit megjithatë janë aty, bashkë me Partizanin, vetëm dy pikë larg.
Impaktin më të mirë në Niko Dovana e pati Teuta. Skuadra e Martinit u imponua në mesfushë, duke dominuar pjesën e parë, por pa mundur të shënonte një gol clirues, pavarësisht mundësive të krijuara. Laci u mundua të dilte pa dëme nga kjo situatë e, të paktën për 45 minuta, ia doli me sukses.
Bardhezinjtë vuajtën presingun asfiksues të skuadrës së Martinit, që insistoi në kërkim të fitores edhe në pjesën e dytë. Duro kërkoi të gjente një rrugëdalje për të tijtë, duke ekuilibruar mesfushën e duke përforcuar prapavijën. Lëvizjet u dukën se mund edhe ta nxirrnin të pamundur, por në të 76 kurbinasit nuk I kishin bërë llogaritë me Dejvi Bregun, që bëri gjithcka vetë: dribloi këdo i doli përpara, për ta dërguar topin aty ku portieri nuk mund të arrijë. Me rezultatin 1-0 u mbyll ndeshja, me Teutën që merr vendin e pare me 46 pikë, po aq sa Vllaznia, ndërkohë që Laci e Partizani pozicionohen me 44.