Shtetet e Bashkuara po marrin në konsideratë një bojkot të koordinuar me aleatët e Lojërave Olimpike Dimërore të Pekinit, të planifikuar për nga 4 deri më 20 shkurt 2022. Lajmin e ka bërë të ditur zëdhënësi i Departamentit të Shtetit Ned Price. Bojkoti “është diçka që ne me siguri duam ta diskutojmë”, iu përgjigj ai gazetarëve që e pyetën nëse SH.B.A. do të merrnin pjesë në Lojërat Olimpike Kineze, duke specifikuar megjithatë se një vendim nuk është marrë ende.
“Një qasje e koordinuar do të ishte jo vetëm në interesin tonë, por edhe në atë të aleatëve dhe partnerëve tanë” vuri në dukje Price, në përputhje me atë që është strategjia e përcaktuar nga Presidenti Biden që synon të ndërtojë “një mur perëndimor” kundër Kinës.
I menjëhershëm reagimi i Kinës: “Politizimi i sportit do të dëmtojë frymën e Kartës Olimpike dhe interesat e atletëve nga të gjitha vendet. Komuniteti ndërkombëtar, përfshirë Komitetin Olimpik të SHBA, nuk do ta pranojë atë”, tha zëdhënësi i Ministrisë së Jashtme Kineze, Zhao Lijian, pasi administrata e Biden bëri të ditur se është në kontakt me aleatët për një qasje të përbashkët (një bojkot i koordinuar e Pekinit 2022) me të cilën do ti përgjigjen abuzimeve të të drejtave të njeriut në Kinë, veçanërisht në Xinjang.