Policia ka njoftuar arrestimin e 5 personave, pjesëtarë të një bande që vidhte nëpër banesa, që dyshohet se kanë kryer vjedhje edhe në vende të Bashkimit Europian. Aksioni u zhvillua mbrëmjen e kaluar në zonën e Liqenit të Thatë dhe policia zbardhi si u godit një grup që grabiste vilat në këtë zonë.
Në pranga kanë rënë Dorjan Lamani (Qirjazi), 38 vjeç, banues në Sarandë, i dënuar më parë për “Kultivim të bimëve narkotike”; Klodian Çypi, 34 vjeç, banues në Derven, Fushë Krujë, i dënuar më parë për “Kultivim të bimëve narkotike”; Halil Topalli, 29 vjeç, banues në Tapizë, Fushë Krujë, i dënuar më parë për “Kanosja” dhe “Kundërshtimi i punonjësve të Policisë”; Redian Begaj, 32 vjeç, banues në Vlorë, i dënuar me parë për “Heqja e paligjshme e lirisë” dhe “Moskallëzim krimi”: Dajvid Dosti, 21 vjeç, banues në Poliçan, Skrapar.
Këta shtetas, në bashkëpunim me njëri-tjetrin, në datën 12.04.2021, janë kapur në flagrancë menjëherë pas kryerjes së vjedhjes së banesës së shtetases B. S., të kompleksi i vilave pas qendrës tregtare “TEG”, ku kanë marrë një shumë të konsiderueshme në euro, bizhuteri dhe sende të tjera me vlerë.