Dita e fundit e festimeve në shtëpinë e Inter. Pas festimit të improvizuar të 2 majit dhe përqafimit në distancë mes tifozëve dhe kampionëve të Italisë me rastin e ndeshjes në shtëpi kundër Sampdorias, më në fund ka ardhur koha për të ngritur kupën e nëntëmbëdhjetë të kampionatit në qiell. 1000 tifozë zikaltër do të jenë në gjendje të marrin pjesë në ceremoninë e dhënies së çmimeve brenda San Siros, ndërsa 4500 të tjerë do të kenë mundësinë të mblidhen jashtë stadiumit: atyre do t’u tregohet trofeu nga Kulla 4 e impiantit, ku do të shfaqen Handanovic dhe shokët e tij.
PROGRAMI
Dita është organizuar në detaje nga djemtë e grupimit Curva Nord, të cilët ishin përgatitur prej gati një muaji: një balonë e gjatë 15 metra, me logon e tyre, do të udhëheqë tifozët drejt stadiumit Meazza dhe do të stacionohet sipër unazës së tretë, me lartësi rreth 60 metra. Në mëngjes, është bërë shpërndarja e materialit festues, pastaj përqendrimi i flamujve jashtë njërës prej hyrjeve në stadium. Pankartat janë sistemuar për të formuar një korridor për mbërritjen e autobusit të ekipit, të përshëndetur nga deliri i mbështetësve zikaltër. Koret dhe flamujt shoqëruan njerëzit e Conte në San Siro.
Gjatë ndeshjes kundër Udineses, tifozët do të vendosen në zonën e përcaktuar prej 19,000 metra katrorë, që u është rezervuar atyre dhe, rreth orës 4 pasdite, ata do të vendosen rreth perimetrit të kthesës për një përqafim virtual. E gjitha në pritje të momentit kryesor, pak pas orës 5 pasdite, kur ekipi do të ngjitet në majë të kullës dhe do të shfaqet para mbështetësve të tyre duke u treguar atyre trofeun që mungon prej 11 vjetësh.
