Një titull për Teutën, kampion. Presidenti Hasanbelliu nuk e fsheh ekzaltimin për një arritje madhështorë pas 27 vjet pritje. E megjithatë e nis Fair Play, duke respektuar kundërshtarin: “Vllaznia ka bërë një sezon shumë të bukur. Për mua është ata e kanë fituar moralisht një trofe. Kanë zhvilluar një kampionat që askush nuk e priste. Dua të falënderoj shumë shkodranët edhe tifozerinë e Vllaznisë. Titullin e fituar ia dedikoj të gjithë durrsakëve, tifozëve, gazetarëve dhe mbarë opinionit publik durrsak”.
Numri 1 i klubit durrësak më pas është lëshuar në eufori, duke bërë edhe një batirë, që ndokujt mund të mos i pëlqejë: “Pas shumë viteve ia dola të sjell një titull kampion. Është diçka e veçantë. Në ndeshjen e kaluar me Laçin u gëzova shumë, ishte emocionuese. Unë e dija se kishim dalë kampionë. E dija se ishim 4 gola para Vllaznisë dhe jo 1 para. Më vonë u pendova që e bëra atë festë”, tha Hasanbelliu.