E ardhmja është shkruar, por realiteti është ndryshe tani sepse bota ka ndryshuar dhe problemet janë rritur me pandeminë. Stevan Zhang nuk ka frikë nga kriza, përpiqet ta kalojë pa u fundosur në të. Inter i tij fitoi titullin pas viteve të hegjemonisë së Juventusit dhe tani objektivi është gjithmonë për të mbajtur ekipin në krye. Që do të thotë, me fjalë të tjera, Champions League. Kështu presidenti zikaltër rrëfehet për La Gazzetta dello Sport dhe bën bilancin pas titullit.
“Kemi nevojë për një plusvalencë të madhe në fund të kësaj merkato transferimesh, por ne duam ta mbajmë ekipin shumë konkurrues për t’i lejuar të bëjë mirë në Champions League dhe padyshim të mundohemi të fitojmë përsëri vitin e ardhshëm, sepse ne duam të të jemi përgjithmonë në mesin e klubeve të mëdha evropiane”. Sidoqoftë, do të jetë shumë e vështirë të fitosh përsëri në Serie A dhe Zhang e pranon pa mëdyshje: “Gjashtë, shtatë klube ëndërrojnë të fitojnë titullin çdo vit, pastaj realiteti është ndryshe. Të shijojmë atë që fituam”.
Presidenti përqendrohet pastaj tek individët duke filluar me Antonio Conten, fabrikuesi i vërtetë i titullit zikaltër: “Që në momentin e parë që morëm Interin menduam se Conte do të ishte trajneri më i mirë për projektin tonë. Dy vjet më parë më në fund arritëm ta sillnim në Milano. Isha dhe mbetem i bindur se Conte është një trajner fitues: kjo është arsyeja që na ka shtyrë të investojmë kaq shumë te ai dhe ekipi në dy vitet e fundit “.
Tani topi shkon te Simone Inzaghi: “Gjatë viteve ai ka treguar se është një teknik me vlerë dhe përvojë, ai ka cilësitë për ta mbajtur klubin tonë konkurrues, gjë që ne duam, por duke bashkëpunuar me ne për të siguruar që Inter të mbetet një klub solid dhe pa rreziqe. E njeh projektin tonë, ka pranuar dhe jemi shumë të lumtur që e kemi këtu, duke shpresuar të jemi në gjendje të fitojmë së bashku ”, shtoi Zhang.